Олоҥхо-марафон: СҮҮРҮҮ-ҮҮНҮҮ
Атырдьах ыйын 30 күнүгэр Дьокуускайга 100 км сүүрүүгэ Арассыыйа чемпионата буолар. Бу улахан тэрээһин чэрчитинэн Олоҥхо-марафон диэн маассабай сүүрүү тэриллэр.
Тоҕо олоҥхо? Тоҕо диэтэххэ, олоҥхоҕо күүстээх санаалаах кыайар, дьулуурдаах соругун ситиһэр, баҕалаах ыратын толорор. Оттон уһуҥҥа сүүрүү эмиэ ол тэҥэ – бэйэни тургутуу, сыалы ситиһии, модун санааны иитии, чөл олоҕу көҕүлээһин, спорт нөҥүө сомоҕолоһуу уонна кэрэҕэ талаһыы.
Онон олоҥхобут култуурунай кодун аан бастаан күрэс киэбигэр көһөрөн, марафон сүрүн өйдөбүлүгэр кубулутан, сүүрүүгэ сүҥкэн суолтаны ууран тэриллэр ЧӨЛ ОЛОХ бырааһынньыгар, олоҥхо бухатыырын курдук сананан, төрөөбүт дойдубут сириттэн-уотуттан, бар дьонуттан, араҥаччылыыр өбүгэлэрбититтэн күүс ылан, бэйэҕэ эрэли үөскэтэн, кыаллыбаты кыайарга сорунан, хааччахтан тахсан, киһи быһыытынан үрдүүргэ өссө биир үктэли дабайыаххайыҥ!
Үчүгэйэ диэн, чемпионакка анаан бэлэмнээбит, стандарт ирдэбилигэр эппиэттиир сертифицированнай трассанан сүүрэҕит.
Сүүрүү уһуна араас арыттаах: 4, 8, 21,1 уонна 42, 2 км. Хас биирдии дистанция – олоҥхо олуга. Холобура, 4 км – Айыыһыт бэлиэлээх, “Уһуктуу” диэн ааттаах (“Пробуждение жизни”). 8 км – Дьөһөгөй Айыы, “Модун санаа” трассата (“Стойкость духа”). 21,1 км – Одун Хаан, “Эстибэт эрчим” (“Источник силы”). 42,2 км – Үрүҥ Аар Тойон, “Чэчирии сайдыы” (“Расцвет героя”).
“Олоҥхо” марафон аҥаардас сүүрүү эрэ буолбакка, култуурунай эмиэ бырагыраамалаах, ону аата да кэрэһилиир. Аны туран, кылгас 4 км дистанцияҕа, өбүгэ ситимин күүһүрдэн, национальнай таҥастаах сүүрүөххэ сөп.
Өссө биир кэрэхсэбиллээҕэ – хас биирдии кыттааччыга бэртээхэй “Стартовый пакет” диэни биэрэллэр. Ол бакыакка туох киирэрин бу хартыынаттан да көрүөххэ сөп.
Онон ким кыттыан баҕарар MOST сыһыарыы көмөтүнэн регистрацияланыҥ. Слот сыаната от ыйын 31 күнүгэр диэри 3450 солк.
Оттон марафон бириистэрин уопсай пуондата — 440 000 солк. Муҥутуур кыайыылаахтар 100, 70, 50 тыһ. солк. харчынан бириэмийэлэри туталлар.
Тэрийээччилэр: СӨ физическэй култуураҕа уонна спорка министиэристибэтэ, Физическэй култуура уонна маассабай спорт управлениета, Дьокуускай куорат уокуруктааҕы дьаһалтата.
Ону сэргэ сүрүн спонсордарынан “АЛРОСА” хампаанньа уонна “Skintime” маҕаһыын, официальнай спонсорынан “Most” сыһыарыы буолаллар.
Марафон сирдьит сирэйэ, суолдьут сулуһа — Арассыыйа чэпчэки атлетикаҕа спордун маастара, 2024 с. Санкт-Петербург куоракка ыытыллыбыт «Белые ночи» норуоттар икки ардыларынааҕы марафон кыайыылааҕа, Арассыыйа 2024, 2025 сс. марафоннарын призера Алена Татаринова-Узнаева.
Бэйэни сайыннарыы суолугар туруммут дьон бары марафон сүүрэр үгэстээхтэр. Ол төрүөтэ – уһуну сүүрүүгэ киһи бэйэтин тургутар, төһө кыахтааҕын билэр, ыарахаттары тулуйарга үөрэнэр, кыайыыга дьулуура, бэйэтигэр эрэлэ күүһүрэр, тиийбэт ырааҕын ситэн, киһи быһыытынан үрдүүр, эт-хаан өттүнэн чэбдигирэр, өйө-санаата сааһыланар, тулуурдаах буоларга уһуйуллар.
Ол иһин бу “Олоҥхо” марафон тосхоло “Сүүрүү – үүнүү, хас биир барбыт килэмиэтириҥ – сайдам санаа саҥа салаата, түмүктүүр биэтэккэ тиийии – Аал Луук Мас чыпчаала”.
Бу улахан тэрээһини көрсө, сарсын от ыйын 31 күнүгэр күнүс 14.30 ч. Үлэ кыбаарталыгар (ул. Труда, 1А), 100 км сүүрүүгэ Арассыыйа чемпионатын уонна Олоҥхо-марафону билиһиннэрии буолар.
СӨ чэпчэки атлетикаҕа сүрүн тириэньэрэ Василий Спиридонов уонна Олоҥхо-марафону тэрийээччи, саха тылын тарҕатар блогер, чөл олоҕу көҕүлүүр урбаанньыт Ирина Матвеева салайан ыытыахтара.
Ону тэҥэ кыттыыны ылыахтара, кэрэхсэбиллээҕи кэпсиэхтэрэ, билиилэриттэн бэрсиэхтэрэ:
Кэлиҥ, кыттыҥ! «Сүүрүү – үүнүү!» тосхолу тутуһарга турунуҥ!