Тыайалар Олоҥхо ыһыаҕар бэлэмнэнэллэр
Эһиил буолаары турар өрөспүүбүлүкэтээҕи Олоҥхо ыһыаҕар бэлэмнэнии үлэтин чэрчитининэн күн бүгүн түмсүүлэринэн, тэрилтэлэринэн уонна биирдиилээн дьонунан тыырыллан, олбох, чаппараах тигии үлэтэ бара турар.
Алтынньы ыйга Кэбээйи улууһун уонна Тыайа нэһилиэгин фольклористарын уонна оһуохайдьыттарын истиэндэтин оҥотторон, үөрүүлээх быһыыга-майгыга арыллыыта буолар. Муус устар ыйга Тыайабыт талааннаах фольклор толорооччута уонна үөрэтээччи Николаев Алексей Семенович сырдык аатыгар улуустааҕы фольклору толорууга күрэх ыытыллынна, манна Тыайаттан уонна Мастаахтан талба талааннаах дьоммут оһуохай, чабырҕах, олоҥхону толорууга күөн күрэстэһэн биир умнуллубат үтүө киэһэни бэлэхтээбиттэрэ. Нэһилиэк устуоруйатын үөрэтэр уонна чинчийэр түмэл бэс ыйыгар арыллан үлэтин-хамнаһын тиигинэччи саҕалаата, сэбиэдиссэй Екатерина Яковлевна Архипова араас хабааннаах тэрээһиннэри күн бүгүҥҥэ диэри тэрийэ олорор, ол курдук, олоҥхо тиэмэтинэн түбэһиннэрэн маастар-кылаастары, үөрэтэр куруһуоктары ыытта.
Биир улахан үлэннэн «Тыайаттан силис тардан» диэн ааттаах нэһилиэкпит биллиилээх дьоннорун искибиэрин арыллыыта үөрүүлээх быһыыга-майгыга сэтинньи ыйга буолара былааннанар. Улуу Кыайыы ыһыаҕар 80 сыл анаараа өттүгэр турбут үс сэргэни саҥалыы уларытан оҥоһуллуу үлэтэ наука доктора Н.К. Данилова салайыытынан саҕаланна.
Ити курдук бэлэмнэнии үлэтэ нэһилиэккэ биир сомоҕо буолан тииһигин быспакка салҕанар.
Иван Гуляев