Биир дойдулаахпыт, биллиилээх фольклорист И.В. Пухов ССРС-ка саха олоҥхотун научнайдык, киэҥник билиһиннэрбит, аан дойдуга төрдүс миэстэлээх «Алаатыыр Ала Туйгун» олоҥхону Бороҕон улууһун аатырбыт олоҥхоһута Наһаар Бөтүкүөптэн-Дьаралыктаах На­һаартан үс үйэтин толору истэн уһу­йуллан, олоҥхо оҥостон толорон, сурукка түһэрэн, норуотугар миҥэ бэлэх хаалларбыт Роман Алексеев-Бөҕө Арамаана (Бөҕө Уола) төрөөбүтэ 125 сылыгар анаммыт ыһыах чэрчитинэн төрөөбүт алаа­һыгар Дабаадымаҕа мэҥэ таас ууруллуута, Тэкэрээттэҕэ ыытыллыбыт ыһыах эрдэттэн толкуйдаммыт былаан быһыытынан сүрдээх тэрээһиннээхтик, интэриэ­һинэйдик ыытыллыбыта.

Странден хос-хос-хос сиэнэ Красноярскайтан Сергей Крейн кэлэн ыалдыттаан, хаан аймахтарын билсэн, үөрэн-көтөн, «наһаа элбэх аймахтардаах эбиппин» диэн астынан барда. Олоҥхоһукка анаммыт ыһыах буоларын быһыытынан, ыһыах сиэрэ-туома, күрэхтэһиилэрэ, оонньуута-көрө барыта тутуһуллан, кэлбит дьон интэриэстэрин тарта.

Олоҥхо дуораһыйда: ыһыах аһыллыытыгар көрдөрүллүбүт олоҥхо бастакы үйэтэ «Кыыс Ньургун» дьүһүйүүтүн көрөн астынныбыт, бөлөҕүнэн толорууга ыытыллыбыт куонкуруска оҕолор, улахан дьон кытыннылар, Олоҥхо ты­йаатырын артыыһа Василина Баланова икки чаас устата толорбут Михаил Шараборин-Кумаарап «Луо бухатыыр» олоҥхотун астына иһиттибит.

Сахаларга суох улахан олоҥхону норуотугар хаалларбыт Бөҕө Арамаанын биһирэмнээх күннэрэ ыытыллыбыт кэмигэр айылҕабыт туран биэрэн, чаҕылыччы тыкпыт күммүт кытта астыннарда, санаабытын көтөхтө.
Барҕа махтал олоҥхоһут Ро­ман Алексеев төрөөбүтэ 125 сылыгар анаммыт икки күннээх тэрээһин үрдүк таһымнаахтык ыытыллыытыгар үлэлэспит улуус дьаһалтатын (баһылыгы солбуйааччы А.Д. Сторожевка), нэһилиэк дьаһалтатын (баһылык Н.Н. Сивцевкэ) салайааччыларыгар, култуура управлениетыгар (нач. С.С. Нафанаиловка, исписэлиис А.Е. Лугиноваҕа), бары тэрээһиннэри кыһаллан ыыппыт култуура үлэһиттэригэр – «Олоҥхо» дьиэтин, В.В. Никифоров – Күлүмнүүр аатынан култуура дыбарыаһын специалистарыгар, улуус хореографтарыгар (чуолаан Ульяна Ноговицынаҕа, Ольга Петроваҕа, Платон Стрекаловскайга) барҕа махтал буоллун.

Ыңырыыбытын ылынан кыттыбыт күндү, мааны ыалдьыттарбытыгар – “Олоҥхо Ассоциа­цията» өрөспүүбүлүкэтээҕи об­щественнай тэрилтэ президенигэр Ф.В. Шишигинаҕа, вице-президент Е.Н. Протодьяконоваҕа, олоҥхону чинчийээччи, үөрэтээччи, филология билимин доктора В.В. Илларионовка, Олоҥхо тыйаатырын артыыһа В.В. Балановаҕа, биир дойдулаахтарбытыгар алгысчыт Владимир Заболоцкайга, ХИФУ Олоҥхо институтун специалиһа О.А. Лугиноваҕа, олоҥхо уһуйааччытыгар Н.И. Мордовскаяҕа махтал тылларын аныыбыт.

Инникитин даҕаны маннык улахан тэрээһиннэри бары биир санаанан сомоҕолоһон ыытыах­тара диэн эрэлбит улахан. Барыгытыгар барҕа махтал! Үлэҕитигэр үрдүк ситиһиини, тус олоххутугар дьолу-соргуну, чэгиэн туруктаах сылдьан улуус култуурата сайда турарыгар дьаныһан туран үлэлээҥ-хамсааҥ.

Бу үрдүк тэрээһиннээх ыһыаҕы ыытыыга санаа ымыыта оҥостон кэлбит олоҥхоһут Арамаан сиэннэрэ Любовь Гаврильевна, Гаврил Гаврильевич Шелковниковтар тэрийэн ыытыыга киэҥ хабаан­наахтык ылсан санаабыт санаалара, баҕарбыт баҕалара ситиһилиннэ. Странден сыдьааннарын ыҥыртаан, быыстапка тэрийэн, ыҥырыылаах ыалдьыттарыгар маанылаах сандалы тула истиҥ кэпсэтиилэри тэрийэн, үөрүүлээх биһирэми олохтоотулар.

Өрөспүүбүлүкэҕэ бастакынан ыытыллыбыт биллиилээх олоҥхоһуттарбыт Петр Олесов-Күөх Бүөтүккэ, Прокопий Слепцов-Намыын, Роман Алексеев-Бөҕө уола кэрэ-бэлиэ дааталарыгар ыытыллыбыт Олоҥхо ыһыахтара өссө да салҕанан бара турдуннар.

Мария Сивцева, СӨ култууратын үтүөлээх үлэһитэ, Уус Алдан улууһун бочуоттаах олохтооҕо