Ийэлэр Олоҥхо ыһыаҕар кылааттара

Кэбээйибит улууһугар алтынньы 17 күнүттэн сэтинньи 30 күнүгэр дылы Ийэлэргэ аналлаах ый биллэриллибитэ. Ол чэрчитинэн, Кэбээйи нэһилиэгин түмсүүлэрин күн күбэй ийэлэрин, эйэҕэс эбээлэрин Ийэ күнүнэн эҕэрдэлээн туран, Кэбээйитээҕи Култуура сайдыытын киинигэр «Ийэ-ыал тэбэр сүрэҕэ» диэн ааттаах төгүрүк остуол тула кэскиллээх кэпсэтии, 2026 сылга буолар Олоҥхо ыһыаҕын тэрээһинин тула сүбэлэһии, ырытыһыы олус сэргэхтик буолан ааста.

Бу көрсүһүүгэ нэһилиэкпит түмсүүлэрэ бэйэлэрин билиһиннэрдилэр, түмсүү үлэтин хайысхатын кэпсээтилэр, ону тэҥэ «Дьахтар олоҕу хамсатар сүдү күүс» диэн ааттаан Олоҥхо ыһыаҕар түмсүүлэрин өттүттэн туох кылаатын киллэрээри сылдьалларын сырдаттылар. Аҕа баһылыгы кытта утары көрсөн олорон санааларын атастастылар, этии киллэртээтилэр.

Бу төгүрүк остуол түмүгүнэн маннык быһаарыныы ылынылынна:
1. Нэһилиэккэ координационнай киин тэриллиитэ.
2. Биир улахан бүтүн нэһилиэги хабар былаан оҥостуу.
3. ТОС уонна НКО сокуоннайдык докумуоннаһыы.
4. Нэһилиэккэ информационнай сырдатыы үлэтин күүһүрдүү.

Төгүрүк остуол кыттыылаахтара маннык хабааһыннаах тэрээһиннэр инникитин да ыытыллаллара наадалааҕын бэлиэтээтилэр. Кыттыыны ылбыт түмсүүлэрбитигэр тэрийэр бөлөх аатыттан махтал бастыҥын тиэрдэбит.

Любовь Семенова,Кэбээйи