Солоҕон олоҥхоһуттарын үйэтиппитэ

Горнай улууһун Бочуоттаах гражданина, үлэ бэтэрээнэ Мария Тарасова-Сэбиэт Маайа 100 сааһын туолла. Ытык кырдьаҕаска Ил Дархан «Үйэ Саас» бэлиэтин туттардылар.

Мария Григорьевна 1925 сыл алтынньы 20 күнүгэр Солоҕоҥҥо олоҥхоһут Тэкээнэй Уола Киргиэлэй дьиэ кэргэнигэр төрөөбүт. Эдэр сааһа Аҕа дойдуну көмүскүүр сэрии сылларыгар түбэһэн, холкуос араас салайар үлэтигэр сылдьыбыта. Кини төһө да үөрэҕэ суоҕун иһин, онтон иҥнибэккэ, оройуон орто сүһүөх каадырынан биэнсийэҕэ тахсыар диэри үлэлээбитэ: сэбиэт бэрэссэдээтэлэ, 4 сыл холкуос бухгалтера, бэрэссэдээтэлэ, 4 сыл оройуон исполкомун инструктора.

Айылҕаттан айдарыылаах салайааччы: «Билигин олох ордук. Барыт дэлэй. Саамай үчүгэй олоххо олороҕут. Биһиэнэ иэдээн этэ, туох да суох», — диир.

Мария Тарасова Горнай улууһугар култуура, уус-уран самодеятельность, норуот айымньыта сайдыытыгар киллэрбит кылаата сүҥкэн. Солоҕон олоҥхоһуттарын дьаныһан туран үөрэтэн, ааттарын-суолларын чуолкайдаан, бэчээккэ бэлэмнээбит үтүө өҥөлөөх.

Александр Тарасов, учуутал:

-Кини аҕата өрөспүүбүлүкэҕэ киэҥник биллэр Тэкээнэй Уола Киргиэлэй диэн олоҥхоһут. Туох да элбэх матырыйаалы Сэбиэт Маайа хаһыспыт эбит. Солоҕон 14 олоҥхоһутун булан, миэхэ чопчулаан биэрбитэ. Баһылай Алексеевтыын биһиги «Ытык эйгэ» диэн кинигэҕэ киллэрбиппит. Онон кини олоҥхоҕо наһаа суолталаах.

«Саха» НКИХ сонуннарыттан