«Олоҥхо-Баттл — 2025» кыайыылаахтара билиннилэр

Саха тыла, култуурата сайдарыгар туһуланар “Олоҥхо-Баттл” бырайыак 2022 сылтан саҕаланан, быйыл төрдүс төгүлүн өрөспүүбүлүкэ дьонун-сэргэтин сэҥээриитин ылан, ыччат ортотугар олоҥхоҕо интэриэһи үөскэттэ. Бииртэн биир толкуйдаммыт ураты түһүмэх, ураты толоруу, инникитин олоҥхо эйгэтэ кэҥииригэр туһалаах буоларын дьүүллүүр сүбэ чилиэннэрэ өйдөөн, бу сылларга суолта биэрэн, кыттан кэлбит олоҥхону толорор ыччакка уонна тэрийээччилэргэ истиҥник махтаналлар. Саха ыччата улуу эпоска сыһыаныттан олоҥхо инники дьылҕата тутулуктааҕын, болҕомто баар буоллаҕына олоҥхо инникилээҕин, маннык ис хоһоонноох тэрээһиннэргэ кыттан ыччат сайдарыгар оруолун бэлиэтээн, сахалыы тыыннаах биэриилэр өссө кэҥии-сайда туралларыгар баҕаларын биллэрдилэр.

2022 сыллаахха 10 ыччат толорооччу кыттыбытыттан бары түһүмэххэ чаҕылхайдык кыттан, Настя Алексеева Кылаан кыайыылаах үрдүк ааты ылбыта; 2023 с. 9 ыччаттан – Станислав Иванов тэҥнээҕин булбакка, Кылаан кыайыылааҕынан тахсыбыта; 2024 с. 10 ыччаттан – Кылаан кыайыылаах удьуор олоҥхону толорооччу Аксиния Степанова буолбута. Бу ыччат билигин олоҥхону толоруунан утумнаахтык дьарыктанан, ситиһиилээхтик үлэлии-хамсыы сылдьаллар. Бу олоҥхо туһугар үлэлии сылдьар дьону үөрдэр.

Быйыл «САХА» көрдөрөр-иһитиннэрэр хампаанньа субуота ахсын быһа эпииргэ таһаарар «Олоҥхо-Баттл» бырайыага алтынньы ый устата олоҥхону толорор ыччат ортотугар бэрт хатыһыылаахтык, сэргэхтик ыытыллан, сэтинньи 1 күнүгэр бүтэһик түһүмэҕэ бэрт тэрээһиннээхтик буолан ааста.

Олоҥхо-Баттл түмүктүүр түһүмэҕэр талыллан кэлэн, 6 ураты эйгэлээх олоҥхону толорооччу кыттыыны ылла. Ол курдук, Мэҥэ Хаҥаластан — Марфа Аммосова, Үөһээ Бүлүүттэн — Никита Аянитов, Горнайтан — Айтал Винокуров, Хаҥаластан — Эрик Егоров, Уус Алдантан — Полина Горохова, Амматтан — Сандаара Слепцова.

Түмүктүүр Олоҥхо-Баттл 3 түһүмэҕинэн ыытылынна. Ол курдук, 1. “Ньургун Боотур” олоҥхо кэрчиктэрин араас омук тылынан толорон иһитиннэрии; 2. Утарыта көрсөн олорон, олоҥхо олук тылларын туттан, бэриллибит сорудаҕынан тута хоһуйуу; 3. Олоҥхо олук тылларынан билиҥҥи кэмҥэ Туймаада уонна Олоҥхо Ыһыаҕын хардарыта хоһуйан иһитиннэрии.

Бастакы сонун түһүмэххэ, билиҥҥи балысхан сайдыы кэмигэр олоҥхону толорор ыччат аҥардас толоруунан эрэ муҥурдаммака, олоҥхону араас омук тылынан үөрэтэригэр, тарҕатарыгар туһаайылынна. Кыттааччылар араас омук тылынан олоҥхолорун олоҥхону үгэс быһыытынан толоруу киэбигэр бэркэ киллэрэн, билиһиннэрэр кыахтаннылар. Бу түһүмэххэ эдэрдэр “Дьулуруйар Ньургун Боотур” олоҥхо алта араас персонаһын ырыатын-тойугун, сэһэнин араас омук тылынан бэрт сэргэхтик толорууларын сэргээн иһиттибит.

Салгыы иккис түһүмэххэ, бэриллибит тиэмэлэринэн тута хоһуйууга кыттааччылар Айтал Винокуров уонна Эрик Егоров Улуу Туймаада Ыһыаҕар Айыы бухатыырдара көрсүһүүлэрин, хапсаҕай, мас тардыһыы, кыыһы эккирэтии түгэннэриттэн толордулар; Никита Аянитов уонна Полина Горохова Бөрө Бухатыыр уонна Саһыл Куо Байанай маанылаабытын хайдах үллэстибиттэрин, Марфа Аммосова уонна Сандаара Слепцова Кэрэ Куолар көрсүһүүлэрин олоҥхо сэһэнинэн, ырыатынан-тойугунан тута хоһуйан толордулар. Түмүктүүр 3-с түһүмэххэ, ыччат толорооччулар иккилии буолан, утарыта көрсөн олорон, былыргылыы үгэһинэн эр биир бэйэ бэйэлэрин хоһуйустулар. Бу икки түһүмэххэ күрэс балаһыанньатын быһыытынан кыра бааллаах, кэлэр өттүгэр элбэҕи эрэннэрэр кыахтаах, икки ыччат кыттааччы туораата – Эрик Егоров уонна Сандаара Слепцова.

Түмүгэр, Олоҥхо-Баттл кыайыылаахтара быһаарыллар түгэннэрэ олус долгутуулаахтык ааста. Телевизорынан көрөөччүлэр олоҥхолуур ыччакка бэйэлэрин СМС куоластарын ыыттылар. Олоҥхо-Баттл уопсай түмүгэ таҕыста. Ол курдук, быйылгы Олоҥхо-Баттлга дьүүллүүр сүбэҕэ үлэлээбиттэр туруорбут сыаналарын уонна көрөөччүлэр СМС куоластарын түмүгүнэн 675 баалы, 243 смс-куолаһы ылан, Кылаан кыайыылааҕынан — олоҥхо этэр тэтимин, ырыатын-тойугун бэркэ толорон, тута хоһуйар дьоҕурунан бэриллибит сорудаҕы кыайа-хото арыйан, болҕомтону тардан, бастыҥ олоҥхону толорооччу Никита Аянитов ааттанна. Кини 500 000 солк. харчынан бириэмийэ сертификатын Саха Өрөспүүбүлүкэтин Бырабыыталыстыбатын Бэрэссэдээтэлин солбуйааччы Сергей Местников илиититтэн тутта. Санаатын ууран утумнаахтык дьарыктанар бастыҥ олоҥхону толорооччу Марфа Аммосова 668 баалы уонна 2148 смс-куолаһы ылан, “Көрөөччү биһирэбилэ” үрдүк ааты ылары ситистэ. Киниэхэ «Саха» НКИХ генеральнай директора Олег Марков 100 000 солк. сертификаты туттарда. 657 бааллаах уонна 567 смс-куоластаах удьуор олоҥхону толорооччу, Айтал Винокуров “Кэскиллээх олоҥхоһут” аатын сүктэ. Киниэхэ олоҥхоһут Валентин Исаков 50 000 солк. сертификаты туттарда. Оттон кэскиллээх олоҥхону толорооччу Полина Горохова 620 баалы уонна 693 куолаһы ылан, “Кэрэмэс олоҥхоһут” диэн анал ааты ылары ситистэ.

Олоҥхо-Баттлга кыттыбыт ыччат олоҥхону толорооччулар бары олоҥхоҕо харыстабыллаахтык сыһыаннаһан, салгыы олоҥхону үөрэтиинэн, толоруунан утумнаахтык дьарыктанар баҕаларын биллэрбиттэрэ киһини үөрдэр.

Эрэлбит барыта ыччакка. Бу эйгэҕэ ыччат хайдах өйдөөн, ылынан сыһыаннаһарыттан олоҥхо инники кэскилэ тутулуктаах.

Сайдыы аартыгар сөптөөх хайысханы тутуһан, салгыы төрөөбүт тылбыт, олоҥхобут, итэҕэлбит, төрүт үгэстэрбит туһугар сиэрдээхтик, санааҕытын холбоон бары үлэлии тураргытыгар баҕарабыт!

Түмүктүүр түһүмэх дьүүллүүр сүбэтин чилиэннэрэ:

Валентин Исаков,

Валентина Бочонина,

Елена Протодьяконова