Олоҥхолоох сарсыарда

Саха Өрөспүүбүлүкэтин бырабыыталыстыбатын 1-кы нүөмэрдээх дьиэтигэр үлэ нэдиэлэтэ бүгүн уратытык саҕаланна: Олоҥхо күнүн көрсө, эбиэккэ диэри бастыҥ толорооччулары тутан олорон иһиттилэр.

Сахалыы судургутук эттэххэ, үрүҥ дьиэ үлэһиттэригэр улуу айымньыбытын билиһиннэрдилэр, ыллаан-туойан сэргэхситтилэр — өрөспүүбүлүкэ улахан түһүлгэлэрин кыайыылааҕа, Мэҥэ Хаҥалас Лоомтукатын А.М. Алексеев аатынан култуура дьиэтин уус-уран салайааччыта  Виталий Никифоров,  эдэрдэргэ өрүү миэстэлэһэр устудьуон, “Саха” НКИХ ыытааччыта,  быйылгы “Олоҥхо-баттл-2025” телевизионнай күрэх кыайыылааҕа Никита Аянитов (Үөһээ Бүлүү) уонна Олоҥхо тыйаатырын артыыһа, олоҥхону толорууга уһуйар Василина Баланова-Кэрэмэс Лыҥкыр  (Өлүөхүмэ). 

Олоҥхону истиэх иннинэ СӨ Национальнай бибилэтиэкэтин үлэһитэ, суруналыыс Анисия Иевлева, олоҥхо эйгэтигэр киллэрэ таарыйа, ыйытыылары биэртэлээтэ. Бары тута хардаран истилэр, бэркэ билэллэрин көрдөрдүлэр.

“Бу бачыым үгэскэ кубулуйан, хас Олоҥхо дэкээдэтин ахсын тэриллэрэ буоллар ”, — диэн култуура миниистирин солбуйааччы Мария Турантаева эҕэрдэ тылыгар эттэ.

Оннук, бу курдук олоҥхолоох сарсыардалар үүнэн истиннэр, үчүгэй холобур атын тэрилтэлэргэ тарҕаннын! Ноо!