Олоҥхобут шедевр буолбута 20 сылыгар анаммыт Олоҥхо күнэ
Бүгүн, Олоҥхо күнүгэр, Былатыан Ойуунускай аатынан Саха академическай тыйаатырыгар саха норуотун тылынан уус-уран айымньытын муҥутуур чыпчаала улуу олоҥхобут ЮНЕСКО шедеврэ буолбута 20 сыллаах өрөгөйдөөх тэрээһинин бэлиэтээтибит.
Аан дойду билиниитин ыларбытыгар улуу олоҥхоһуттарбыт уонна Былатыан Ойуунскай суруйан хаалларбыт «Дьулуруйар Ньургун Боотур» айымньыта олук буолбута. Биһиги ытык дьоммутугар, төрдүттэн үөрэппит учуонайдарбытыгар Агафья Еремеевна Захароваҕа, Олоҥхо үнүстүүтүн бастакы дириэктэригэр Василий Николаевич Ивановка, Василий Васильевич Илларионовка, Елена Николаевна Протодьяконоваҕа сүгүрүйэбит.
Онтон ыла бу сүүрбэ сыл иһигэр Олоҥхо Ассоциацията, Олоҥхо тыйаатыра, Олоҥхо үнүстүүтэ тэриллибиттэрэ, сыллата өрөспүүбүлүкэ таһымнаах Олоҥхо ыһыаҕа уонна Олоҥхо күнэ бэлиэтэнэр буолбуттара. Бырабыыталыстыба уонна уопсастыбаннас өйөөн улуустарга Олоҥхо дьиэлэрэ ситимнээхтик үлэлииллэр, саха тыла, култуурата, үгэһэ сайдарыгар оҕотуттан аҕа саастаах дьону түмэр бэстибээллэр, күрэстэр ыытылланнар утумнаах үлэ барар диэн бэлиэтиибин.
Бу үлэ салҕанарыгар Ил Дархан Айсен Сергеевич Николаев бүгүн Олоҥхобутун судаарыстыба өттүттэн өйүүр, харыстыыр, тарҕатар уонна араас норуоттары кытта бииргэ үлэлэһэр, сайыннарар туһугар Саха өрөспүүбүлүкэтигэр 2026-2035 сылларга Олоҥхо үһүс 10 сылын биллэрэр 870 нүөмэрдээх дьаһалга илии баттаата, чиҥэтэн бигэргэттэ!
Кэлэр уон сылга киһи аймах тылынан уонна өйүнэн айбыт чулуу айымньыта — Олоҥхо кэскилэ өссө кэҥээтин, саргыта салгыы салалыннын. Саллар саас тухары олоххо – саханы үрдэтиэ олоҥхо!
Хаартыска: Саргын Скрябин