Ноорой сиэнэ эһэтин «Күн Эрили» олоҥхотун толорорун иһиттибит
Бары билэбит, олоҥхо – саха норуотун тылынан уус-уран айымньытын муҥутуур чыпчаала, үйэттэн үйэ, көлүөнэттэн көлүөнэ тухары бэриллэн испит дириҥ ис хоһоонноох баайбыт. Санатан эттэххэ, 2005 ЮНЕСКО олоҥхону аан дойду култууратын, киһи аймах уус-уран тылынан уонна материальнайа суох нэһилиэстибэтин шедевринэн билиммитэ.
Сэтинньи 26 күнүгэр, Олоҥхо декадатын чэрчитинэн, П.П. Ядрихинскай-Бэдьээлэ аатынан Олоҥхо дьиэтин салайааччыта Вера Колпашникова көҕүлээһининэн, олоҥхону истии тэрилинннэ.
Ыҥырыылаах норуот ырыаһыта, олоҥхоһут Николай Иванович Степанов-Ноорой сиэнэ, ыалдьытынан СӨ култууратын туйгуна, «Олоҥхо-БАТТЛ-2024» телевизионнай күрэх уонна быйыл Узбекистаҥҥа ыытыллыбыт бүтүн аан дойдутааҕы «БАХШИ» фольклор бэстибээлин кыайыылааҕа, Мэҥэ Хаҥаластан тардыылаах Аксиния Степанова буолла. Кини Вера Васильевна ыҥырыытынан Нам улууһугар иккис сырыыта. Бу күн эһэтин «Күн Эрили» олоҥхотуттан быһа тардыыны 1 чаастан ордук толордо.
Устар ууну сомоҕолуур уус тыллаах, ийэ тылы иҥэриммит, төрүт тылы төлкөлөөбүт ыччат киһи саха героическай эпоһын туттан-хаптан, куолаһынан оонньотон, араас уус-уран ньымалары — эпитеты, тэҥнээһини, омуннааһыны, ханалытан этиини о.д.а. албастары туттан, оруолларынан ыллаата-туойда. Ол курдук, Айыы аймаҕын араҥаччылыыр Күн Эрили бухатыыр сири сиксигинэн тилийэ сүүрэн, халлааны улаҕатынан тэлэһийэ көтөн, хараҥа күүстэри утары охсуһан кыайан, орто дойдуга уу нуурал олоҕу түстүүрүн толордо. Көрөччү кутун-сүрүн тутуон тутта. Чахчы да сөҕүмэр артыыстыыр талааннааҕыттан астынныбыт.
Аксиния Николаевна олоҥхону түмүктээн баран, бэйэтэ билиммитинэн, иккис кыната үүммүт сиригэр — эбэтэ Дария Николаевна Степанова (Леонтьева) Нам улууһун 2 Хомустааҕын Буойунуттан силистээх сирин-буорун, Эҥсиэли хочотугар үктэнэн (кыһыл бартыһаан Николай Иванович Леонтьев-Буойун кыыһа. Буойун Ньукулай Сэбиэскэй былаас олохтонор былдьаһыктаах сылларыгар үрүҥнэргэ түбэһэн кыыллыы сэймэктэнэн өлбүтэ. Кэлин төрөөбүт сиригэр кини аатынан «Буойун» холкуос тэриллибитэ, учаастак эмиэ кини аатын сүкпүтэ. 2 Хомустаахха кини аатын үйэтитэн обелиск турбута, ол билигин да баар) хаан аймахтарын –таайдарын Егор Романович, Роман Романович, Иван Романович, эдьиийин Анастасия Романовна Леонтьевтары, кинилэр ыччаттарын, кырдьаҕас күтүөтүн Иосиф Никитич Замятины кытта билсэн — удьуор ситимин саҥа утаҕа силбэммититтэн астынарын, сүргэтэ көтөҕүллүбүтүн биллэрдэ. Кини олоҥхо истиитин сахалыы норуот ырыатын толорон силигин ситэрдэ.
Видеоплеер
Бэлиэ тэрээһиҥҥэ олоҥхону толорооччу Аксиния Степанованы Нам улууһун баһылыгын солбуйааччы, Олоҥхо fссоциациятын салайааччыта Егор Протопопов, улуустааҕы культура управлениетын начальнига Семен Ядрихинскай, Олоҥхо дьиэтин салайааччыта Вера Колпашникова, саха төрүт култууратын тэнитиигэ бииргэ кыттыбыт талба талааннаах Руслан Захаров, Владимир Сыромятников, Никольскай нэһилиэгин баһылыга Уйгу Сайаан Айхан уола, аймахтара Егор Леонтьев, Иосиф Замятин, Гаврил Леонтьев, эбэтин дойдутуттан, 2-с Хомустаах дьаһалтатын аатыттан Лидия Пестрякова-Үүнэр кыыһа Намыйа, Ленскэй нэһилиэк дьаһалтатын кылаабынай специалиһа Наталия Ким истиҥник эҕэрдэлээтилэр, олоҥхону толорууга айар талаана арыллан, дьонун-сэргэтин үөрдэ турарыгар, ситиһиилээх үлэни баҕардылар, сибэкки дьөрбөтүн, эҕэрдэ суруктары, сэмэй бэлэхтэри туттардылар. Истиҥ көрсүһүү уопсай хаартыскаҕа түһүүнэн түмүктэннэ. Олоҥхону толоруу, Аал Луук мастыы, үүнэ-сайда, оҕо-ыччат толоруутунан чэчирии турдун.
Касьян Олесов-Олук, Нам
Ааптар түһэриилэрэ.