Олоҥхо тута тургутугун түмүгэ
“Олоҥхо дьыктаана” аахсыйа чэрчитинэн өрөспүүбүлүкэ оскуолаларын V-XI кылаастарыгар тута тургутук, ол эбэтэр онлайн тест иккис сылын Национальнай бибилэтиэкэ саайтын анал платформатыгар сэтинньи 24-28 күннэригэр ыытылынна.
Быйыл эмиэ үтүмэн оҕо кытынна: 19 684. Былырыын Олоҥхо дэкээдэтин былаһын тухары 10 күн устата ыытыллыбыт буолан, 32 тыһыынчаттан тахса этэ. Ол эрээри онно сорохтор, түмүктэрин тупсараары, хаста да киирэн толорбуттара биллибитэ. Онон билии дьиҥ таһымын уонна кыттааччы чопчу ахсаанын быһаарарга бутуурдаах соҕуһа.
Ол иһин бу сырыыга биирдэ эрэ холонор гына оҥордубут. Уонна көмө туһамматтарын курдук, өссө бириэмэлээх гынныбыт. Онон түмүк олох дьэҥкэ: орто баал V-VIII кылаастарга 5,52 тэҥнэстэ, оттон VIII-ХI кылаастарга – 5, 98. Ити 10 баалтан. Куһаҕана суох көрдөрүү – аныгы ыччат олоҥхо туһунан тирэх өйдөбүллээх эбит.
Бу тест сүрүн көдьүүһэ итиннэ сытар – ыйытыыларга хоруйдуу таарыйа, олоҥхо туһунан элбэҕи билэн хаалалларыгар. Көннөрү дьыктаан курдук суруйардааҕар, тургутук киэбинэн барара оҕолорго быдан интэриэһинэй, оонньуу тэҥэ буоллаҕа эбээт.
Аны икки тылынан уонна онлайн буолан, өрөспүүбүлүкэ ханнык баҕарар муннугар олорон, омугуттан тутулуга суох, этэргэ дылы, саха, нуучча, бүрээт оҕото бары, хаһан уонна ханна бэйэлэригэр табыгастааҕынан толорор кыахтаахтар, эбиитин тута сэртипикээт ылаллар.
Ол эрээри сорох кытыы сирдэргэ, сүрүннээн хоту улуустарга, интэриниэт мөлтөҕө адаҕалаата.
Аартыка 13 оройуонугар саамай көхтөөх оскуолалары бэлиэтиир буоллахха: Белай Гора (Абый) Анаабыр уонна Үрүҥ Хайа (Анаабыр), Эбээх, Ойуһардаах, Алаһыай, Налимскай, Өлөөкө Күөл (Орто Халыма), Боруулаах (Үөһээ Дьааҥы), Тумат (Усуйаана), Арыылаах (Үөһээ Халыма), Улахан Чыыстай (Муома), Өлөөн Х.М. Николаев аатынан уонна Ээйик (Өлөөн), Эдьигээн уонна Лииндэ (Эдьигээн), Өймөкөөн уонна Сордоҥноох (Өймөкөөн).
Бу зонаҕа Үрүҥ Хайа көрдөрүүтэ уһулуччу, онон кинилэр бастыыллар уонна Добун суругунан тэрийээччилэр ааттарыттан наҕараадаланаллар. Тустаах оскуолаҕа тургутугу көҕүлээн ыытта — саха тылын учуутала Елизавета Владимировна Иванова. Киниэхэ уонна үөһэ этиллибит оскуолаларга үлэлэспит уһуйааччыларга Махтал суруктары электроннай көрүҥүнэн тиксэриэхпит.
Дьокуускай куораттан уонна тулатынааҕы оскуолаларыттан барыта 4666 оҕо кытынна.
Бу бөлөххө Дьокуускай 20-с нүөмэрдээх оскуолата эрэллээхтик бастыыр (дир. А.И. Новоприезжай). Сахалартан бастакынан Сэбиэскэй Сойуус Дьоруойа буолбут Федор Попов аатын чиэстээхтик сүгэр кыһа оҕолоро Улуу Кыайыы 80 сылыгар кыайбыттара хайҕаллаах. Былырыын эмиэ үчүгэй көрдөрүүлээх этилэрэ. Манна “Олоҥхо дьыктаана” аахсыйаны көҕүлүүр киһинэн саха тылын учуутала Марианна Макаровна Федорова буолар. Киниэхэ уонна бу табылыыссаҕа көстөр оскуолаларга тургутукка кыттыыны сүрүннээбит учууталларга – Махтал суруктар.
Илин эҥээр, киин уонна Бүлүү бөлөх:
“Дьулуруйар Ньургун Боотур” олоҥхо үөскээбит, айыллыбыт Таатта улууһа аҥаардас бу бөлөххө эрэ буолбатах, уопсайынан ылан көрдөххө, өрөспүүбүлүкэ оройуоннарыттан барыларыттан саамай үрдүк көрдөрүүлээх буолан, Кылаан чыпчаал туоһу суругун ылар. Манна даҕатан эттэххэ, таатталар улахан дьоҥҥо эмиэ инники күөҥҥэ сылдьаллар, олоҥхо дьыктаанын суруйууга иккис сылларын кыайдылар. Бу улуус оскуолалара бары 100 бырыһыан тургутугу оҥорбуттар. Онон оскуолаларга барыларыгар Добун сурук туттарыллар.
Итини сэргэ бастыҥ көрдөрүү иһин I үрдэллээх Добун суругунан наҕараадаланаллар: Амматтан В.Г. Короленко аатынан 1-кы №-дээх оскуола, Л.В. Киренскэй аатынан лиссиэй, Бүлүүттэн Г.И. Чиряев аатынан 1-кы №-дээх оскуола, И.Л. Кондаков аатынан гимназия, Тааһаҕар Н.Н. Каратаев, I Күүлэт П.А.Павлов ааттарынан оскуолалара, Сунтаартан Тойбохой Г.Е. Бессонов, Түбэй-Дьаархан С.А. Зверев ааттарынан оскуолалара, Үөһээ Бүлүүттэн Боотулуу оскуолата, Хаҥаластан Ой А.В. Дмитриев аатынан оскуолата, Намтан 3-с нүөмэрдээх уонна Хатыҥ Арыы И.Е. Винокуров аатынан оскуолалара, Мэҥэ Хаҥаластан Павловскай, Төҥүлү А.С. Шахурдин, Майа Ф.Г.Охлопков ааттарынан оскуолалара, Ньурбаттан Ст. Васильев аатынан элбэх хайысхалаах гимназия, Горнайтан Кэптин уонна Атамай В.Д. Лонгинов аатынан оскуолалара, Чурапчыттан Алаҕар Г.Д. Протодьяконов аатынан оскуолата, Уус Алдантан Лөгөй кэккэ биридиэмиэттэри дириҥэтэн үөрэтэр оскуолата, Мүрү “Уолан” гимназията, Кэбээйиттэн Е.Е. Эверстов, Мастаах Н.П. Егоров ааттарынан оскуолалара, Томпоттон Кириэс Халдьаайы Ф.Охлопков аатынан оскуолата.
II үрдэллээх Добун суругунан: Амматтан Амма-Наахара, Сулҕаччы, Эмис В.М. Новиков-Күннүк Уурастыырап, Алтан Е.С. Никитина ааттарынан оскуолалара, Бүлүүттэн 2-с Күүлэт Н.А. Алексеев, Кыргыдай Д.А.Гуляев, Лөкөчөөн А.И. Леонтьев ааттарынан оскуолалара, Хаҥаластан Мохсоҕоллоох, Хачыкаат С.П. Барашков, Булгунньахтаах С.П. Ефремов ааттарынан оскуолалара, Кэбээйиттэн Танара оскуолата, Томпоттон Дьэбэрики Хайа оскуолата, Чурапчыттан С.А.Новгородов, Сылаҥ Г.П. Башарин ааттарынан оскуолалара, Мэҥэ Хаҥаластан Хорообут Дм. Таас, Майа В.П. Ларионов, Хара И.Г. Игнатьев спортивнай, Төхтүр И.М. Романов ааттарынан, Аллараа Бэстээх 1-кы уонна 2-с №-дээх, Наахара оскуолалара, Майа И.Г. Тимофеев аатынан лиссиэйэ, Горнайтан Бэрдьигэстээх улуустааҕы гимназията, Кировскай оскуолата, Үөһээ Бүлүүттэн Д.С. Спиридонов аатынан 4-с нүөмэрдээх уонна Дүллүкү оскуолалара, М.А.Алексеев аатынан өрөспүүбүлүкэтээҕи интэринээттээх лиссиэй, Чурапчыттан Одьулуун, Болтоҥо Н.Д. Субуурускай, Мугудай Д.Д. Красильников, Кытаанах В.С.Яковлева-Далан ааттарынан оскуолалара, Уус Алдантан Суотту, Курбуһах Н.Н. Окоемов, Тулуна П.В. Аммосов ааттарынан, Өнөр оскуолалара, Сунтаартан интэринээттээх политехническай лиссиэй, Намтан Хамаҕатта В.П. Артамонов аатынан саха-француз лиссиэйэ.
III үрдэллээх Добун суругу туталлар Хаҥаластан 5-с Малдьаҕар, Хоточчу оскуолалара, Сунтаартан 3-с №-дээх, Кэмпэндээйи В.И. Иванов аатынан, Ньурбаттан Хатыы Н.И. Прокопьев, Өҥөлдьө Д.И. Павлов ааттарынан оскуолалара, Уус Алдантан Чэриктэй, Баатаҕай Н.Н. Тарскай аатынан, Сыырдаах, Танда оскуолалара, Намтан Салбаҥ оскуолата, Мэҥэ Хаҥаластан Хаптаҕай, Ороссолуода, Моорук, Бүтэйдээх К.О. Гаврилов, Бэдьимэ Н.Д Неустроев, Мэлдьэхси А.В. Чугунов ааттарынан оскуолалара, Бүлүүттэн Н.С. Степанов аатынан 3-с нүөмэрдээх оскуола, Чурапчыттан Хайахсыт А.П. Илларионов аатынан оскуолата, Үөһээ Бүлүүттэн Мэйик оскуолата, Кэбээйиттэн Куокуй, Лүксүгүн, Баҕадьа, Сиэгэн Күөл оскуолалара.
Соҕурууҥҥу уонна арҕааҥҥы бырамыысыланнай оройуоннарга быйыл тургутук тэрээһинэ мөлтөхтүк барбыт. Былырыын нерюнгрилар Олоҥхо ыһыаҕа буоларынан көхтөөх этилэрэ… Чэ, онон кэккэ оскуолалары эрэ бэлиэтиибит: Ленскэйтэн Бэчинчэ Е. Мыреев аатынан оскуолата, Өлүөхүмэттэн Токко П.П.Ощепков аатынан интэринээттээх, Үҥкүр В.И. Сергеев, Уолбут П.П. Габышев ааттарынан оскуолалара. Ити кыһаларга оҕолору көҕүлээбит учууталларга – Махтал сурук .
Бу тургутук көмөтүнэн Олоҥхо дэкээдэтин кэмигэр 20 тыһыынча кэриҥэ оҕо, олоҥхо эйгэтин кытта алтыһан, төһө билэрин тургутун көрдөҕө, баалын көрөн, бэйэтигэр түмүктэри ылыннаҕа, элбэҕи иҥэриннэҕэ — бу буоллаҕа эбээт барыбыт кыайыыбыт!
Билсэр төлөпүөҥҥүт: 89142223579.