Кини олоҕун ис тыына – олоҥхо

Чахчы, Екатерина Петровна Чехордуна олоҕун ис тыына – олоҥхо. “Бэйэтэ да, хайдах эрэ, олоҥхо персонаһын, биһирэмнээх дьоруойун курдук: аҕыс иилээх-саҕалаах аан дойдуну анаарар мындыр дириҥ толкуйдаах, сахалыы сэмэй сиэрдээх, өрүкүйбүтү, уолуйбуту уоскутар намыын саҥалаах, куйаарынан эргийэр киэҥ билиилээх, хааһахтан-хоспохтон хостоон эрэрдии, хомоҕойдук кэпсиир уус-уран тыллаах”, – диэн өрүү бэлиэтиир эдэр соратнига Геннадий Охлопков.

Оннук үтүө киһи 80 сааһын туолар үбүлүөйдээх дьоро күнүгэр дьон бөҕө эҕэрдэлии кэлбит: Тыараһаттан биир дойдулаахтара, Дьохсоҕоҥҥо үөрэппит оҕолоро, Тааттаҕа үөрэх салалтатыгар, итиэннэ Дьокуускайга Төрүт оскуолалары чинчийэр үнүстүүккэ бииргэ үлэлээбит кэллиэгэлэрэ, кини тэрийиитинэн ыытыллыбыт Ойуунускай ааҕыыларын кыттыылаахтара, “Арылы кустук” диэн олоҥхо ситимигэр баар оҕо уһуйааннарын иитээччилэрэ, сэбиэдиссэйдэрэ, олоҥхо педагогикатын чинчийиигэ уонна оҕону сайыннарар “Эркээйи эргиирэ” бырагыраамаҕа бииргэ үлэлэспиттэрэ, Олоҥхо ассоциациятыттан уонна тыйаатырыттан, о.д.а.

Тэрээһин Национальнай бибилэтиэкэ историческай салаатыгар ахсынньы 24 күнүгэр буолла.  Таатта улууһун култуураҕа салаатын начаалынньыга Изабелла Александровна Сивцева өрө көтөҕүллүүлээхтик бэркэ салайан ыытта.

Дьэ, биир киһи сабыдыала уонна дьайыыта сүдү да буолар эбит! Екатерина Петровна СЭДИП технологиятыгар, олоҥхо педагогикатыгар чинчийбит үлэлэригэр, суруйбут кинигэлэригэр, сүрүннүүр бырайыактарыгар  тирэҕирэн, кэнчээри ыччаты иитиигэ өрөспүүбүлүкэ үрдүнэн үтүмэн үлэ утумнаахтык ыытыллыбыт уонна, сүрүнэ, саҥалыы киэптэнэн салҕанан бара турар эбит.

  Бэйэбэр арыйыым диэн, Екатерина Петровна ити саргылаах санааларын сааһылыыр, тоҕоостоох толкуйдарын тобулар түгэнэ – быысыбайдыыр кэмэ эбит.

Сахалыы оһуордаах-мандардаах чаппараахтары, көбүөрдэри, олоҥхо тиэмэтигэр ойуулаах паннолары оҥортообутун көрдөрүүгэ туруорда.

Оттон кини бэчээттэнэн тахсыбыт матырыйаалларын түмэн, СӨ Национальнай бибилэтиэкэтин кыраайы үөрэтэр салаата бэртээхэй быыстапканы бэлэмнээбит.

“Духуобунай баайдаах киһи кырдьыбат”, – дииллэр. Оттон олох оҥоһуутун, оҥкулун ойуулуур олоҥхо дириҥ байҕалыгар умсугуйа умсан, онтон сырдыкка сирдиир күлүүс тыллары, сөпкө олорорго туһаайар тутаах өйдөбүллэри, сайдыыбытыгар туһалыыр тирэх тосхоллору  хостоон таһааран, бар дьонугар утары ууммут киһи ытыктабыл, таптал уонна махтал аргыстаах буоларын Екатерина Петровнаҕа этиллибит истиҥ билиниилэртэн итэҕэйдибит.

Өссө да айа-тута сырыт, Екатерина Петровна! Олоҥхоһут аҕаҥ Бүөтүр Афанасьевич Чохордуун ырыалаах-тойуктаах, уус тыллаах эйгэтигэр улаатан, ол иҥэриммиккин идэ оҥостон, олоххун уһуйар-чинчийэр соргулаах үлэҕэ анаан, саха омук норуот быһыытынан барҕарыытыгар, тупсар тускулугар сүҥкэн өҥөнү оҥороруҥ өрүү бу курдук үтүө тылынан ахтылла туруо, кэрэ кэскилбит тулааһына буолан туругуруо!

Анисия Иевлева.