Хомуур олоҥхо иккиһин ыытылынна

Ахсынньы 13 күнүгэр Дьокуускай куоракка П.А.Ойуунускай аатынан Литературнай музейга учуонай-фольклорист, литературовед, филологическай наука кандидата, Россия наукаларын академиятын Сибиирдээҕи салаатын үтүөлээх бэтэрээнэ, Саха Республикатын культуратын үтүөлээх үлэһитэ, П.А. Ойуунускай аатынан Саха Республикатын Государственнай бириэмийэтин лауреата, Саха Республикатын Духуобунаһын академиятын академига, Россия суруйааччыларын Сойууһун чилиэнэ, Таатта уонна Чурапчы улуустарын бочуоттаах гражданина С.П. Ойунская төрөөбүтэ 90 сылыгар ананар, СР Олоҥхо ассоциацията, Таатта улууһун Олоҥхо филиала, Норуот айымньытын улуустааҕы дьиэтэ, Л.Н.Турнин аатынан “Алгыс” норуот айымньытын дьиэтэ тэрийиилэринэн иккис төгүлүн «Хомуур олоҥхо»  тэрээһин үрдүк таһымнаахтык буолан ааста.  

Бу бырайыак Таатта улууһун норуот айымньытын дьиэтин фольклору сүрүннүүр методиһа Майя Гаврильевна Егорова бырайыагынан, аан бастакытын 2023 с. «Иис-Уус-Ас» диэн фестиваль чэрчитинэн Таатта улууһун Чөркөөх сиригэр-уотугар П.А.Ойуунускай төрөөбүтэ 130 сылыгар ананан ыытыллыбыта. Үгүс дьон болҕомтотун тардан, биһирэбилин ылан, бастыҥ олоҥхону толорооччуларын биир түһүлгэҕэ түмэр  «Хомуур олоҥхо» бырайыага быйыл республикатааҕы Олоҥхо декадатын түмүктүүр тэрээһинэ буолла.

П.А.Ойуунускай отут суол олоҥхоттон хомуйан, сурукка киллэрбит «Дьулуруйар Ньургун Боотур» олоҥхо 9 ырыатын республикабыт бастыҥ олоҥхону толорооччулара, Олоҥхо ыһыаҕын күрэстэрин кылаан кыайыылаахтара алтыа буолан түөрт чаас устата толорон иһитиннэрдилэ

1, 3 ырыаны — Тихонов Петр Максимович, Мэҥэ Хаҥалас улууһа
2 ырыаны — Багардынов Александр Никифорович, Таатта улууһа
4 ырыаны — Попов Афанасий Николаевич, Таатта улууһа
5 ырыаны — Христофоров Анатолий Иванович, Чурапчы улууһа
6 ырыаны — Ньургусова Яна Петровна, Нам улууһа
7,8,9 ырыаны —  Николаев Алексей Николаевич, Таатта улууһа «Хомуур олоҥхо» алгыһын сиэрин-туомун Попов Афанасий Николаевич ыытта, түмэл балаҕанын көмүлүөк оһоҕун оттон, аал уотун арыылаах  алаадьынан, саламаатынан, кыынньар кымыһынан айах тутта.
Ахсынньы тымныытын аахсыбакка, олоҥхону сэҥээрээччилэр тоҕуоруһа мустан, болдьоммут чааска тэрээһин саҕаланна. Бу олоҥхо түһүлгэтин тэрийиитигэр иккис сылларын моой-арҕас ылсан үлэлиир Тыараһатааҕы Л.Н.Турнин аатынан «Алгыс» норуот айымньытын дьиэтин коллектива кэлбит дьону арыылаах алаадьынан, саламаатынан, итии чэйинэн күндүлээн көрүстэ. Саха Республикатын Олоҥхо ассоциациятын президенэ Февронья Васильевна Шишигина, Олоҥхо ассоциациятын Тааттатааҕы филиалын  салайааччыта Изабелла Александровна Сивцева «Хомуур олоҥхо» тэрээһинэ сайдар кэскиллээҕин бэлиэтээтилэр, Таатта улууһуттан саҕыллан тахсыбыт сонун бырайыак атын улуустарга үтүө холобур буоларын тоһоҕолоон эттилэр. П.А.Ойуунускай аатынан Литэрэтиирэ түмэлин научнай сотруднига Ефросинья Семеновна Ноговицына түмэл матырыйаалыгар олоҕуран, сэдэх хаартыскалары слайданан көрдөрөн, П.А.Ойуунускай олоҥхоһуттары кытта алтыһыытын, олоҥхо тула ыыппыт үлэтин сырдатар олус интэриэһинэй иһитиннэрии оҥордо.
Дьэ, ол кэннэ олоҥхону толорооччуларбыт биир-биир, хоммут уостарын хоҥнорон, өрөөбүт уостарын өһүлэн, саҥаран-иҥэрэн, кэпсээн-ипсээн, оруолларыгар киирэн, ыллаан-туойан бардылар. Бииртэн биир ураты толорууну бу күн олоҥхо түһүлгэтигэр мустубут дьон олус умсугуйан, «Ноо!» диэн сэргээн иһиттилэр.
Тэрээһин биир долгутуулаах түгэнинэн, СР Култуураҕа уонна духуобунаска миниистирин солбуйааччы Мария Васильевна Турантаева кэлэн, Александр Никифорович Багардыновка СР Култууратын туйгуна диэн ааты туттарыыта буолла. Мария Васильевна, «Хомуур олоҥхо» тэрээһин историческай суолталааҕын бэлиэтээтэ. Маннык үтүө тэрээһин уопсай хаартыскаҕа түһүүнэн, толору астаах сандалы тула олорон санаа атастаһыытынан түмүктэннэ.

Галина ПОЛУСКИНА.