Олоҥхону грампластинкаҕа устубут Геннадий Любимовы кытары көрүстүбүт
РСФСР үтүөлээх, Саха АССР народнай артыыһа Гаврил Колесов үөрэнээччитэ, Олоҥхо үнүстүүтэ арыллан, айымньылаах аартыкка үктэнэн үлэлииригэр олук уурсубут Варвара Обоюкова Санкт-Петербурга олорор, таһаарыылаахтык үлэлиир-хамсыыр эбит. Кини «Дьулуруйар Ньургун Боотур» олоҥхону грампластинкаҕа уһулбут Геннадий Любимов Санкт-Петербурга олорорун кэпсээтэ, киниэхэ дьиэтигэр бара сылдьыахха сөбүн эттэ.
Дьэ онон, Варвара Валерьевна эрдэттэн Геннадий Павловичтыын кэпсэтэн, сөбүлэҥин ылан, болдьоммут күммүтүгэр, чааспытыгар киниэхэ кыбартыыратыгар тиийдибит. Биһигини ааҥҥа үрдүк уҥуохтаах ытык кырдьаҕас мичээрдээбитинэн көрүстэ. Мин улуу киһибит Былатыан Ойуунускай төрөөбүт дойдутуттан Тааттаттан сылдьарбын, ханна үлэлиирбин, туох сыаллаах-соруктаах кэлбиппин билиһиннэрдим.
Геннадий Павлович ааспыт кэмин ахтан-санаан ылла. 1968 сыллаахха 8 чаастан ордук уһуннаах олоҥхону Гаврил Колесов толоруутуггар тоҕус гигант-грампластинкаҕа устубут. Олоҥхону үйэтитиигэ сүҥкэн кылаатын сыаналаан, өрөспүүбүлүкэ салалтата Геннадий Павловиһы «Саха Өрөспүүбүлүкэтин култууратын үтүөлээх үлэһитэ», «Гражданскай килбиэн», «Саха АССР төрүттэммитэ 100 сыла» бэлиэлэринэн наҕараадалаабыт.
– Биһиги олоҥхобут үйэтитиллиитигэр саха норуота улахан махталлаахпыт! – диэн Геннадий Павловичка ис сүрэхпиттэн махтанныбыт, сибэкки дьөрбөтүн бэлэхтээтибит, саха соботунан, Таатта халыҥ сис ойууруттан үргэммит отонунан күндүлээтибит.
Саха норуотун уһулуччулаах дьонун Гаврил Колесовы, Христофор Максимовы кытары билсибитин, доҕордоспутун үтүө тылынан аҕынна. Сахалыы сувенирдарын көрдөрдө. Сахалыы чорооно 1968 сыллаах, саха быһаҕа, саахыматтыы тигиллибит сыттык хаалара, олоҥхолуу олорор оҕонньор уруһуйа, сылгы тириититтэн тэллэх, о.д.а. Бу барыта кинини Саха сирэ — Олоҥхо дойдута диэн санааҕа сирдиир. Киһи аймах барҕа баайа буолбут олоҥхобутун грампластинкаҕа уһулбут Ленинградтааҕы «Мелодия» студия звукорежиссера Геннадий Павлович Любимовтыын көрсөн, билсэн олус үөрдүм, астынным, олоҕум өйдөбүллээх сүппэт түгэннэрин бэлиэ түгэнинэн өйбөр-сүрэхпэр хатаатым!
Вера Канаева.
Хаартыскалары ааптар тиксэрдэ