Тулуна оскуолата — оҕону олоҥхоҕо уһуйар кыһа

Олоҥхо — саха фольклорун муҥутуур чыпчаала, киһини бары өттүнэн сайыннарар күлүүс айымньы. “Саха биибилийэтэ” диэн мээнэҕэ ааттаабаттар. Олоҥхону оҕо эрдэхтэн ылыныы улахан оруоллаах. Оҕону сахалыы тыыҥҥа киллэриигэ норуот тылынан уус-уран айымньытын араас көрүҥнэринэн (олоҥхо, чабырҕах, үгэ) кылаас таһынан дьарыктаныыга Тулуна орто оскуолатын алын сүһүөх учууталлара үлэлээбиттэрэ 20-чэ сыл буолла.

Оскуола олоҥхо дьарыгар үс бөлөхтөөх: «Түһүлгэ», «Ыллык», «Сардаҥа». Ону таһынан хомусчуттар кыра, орто бөлөхтөрө уонна «Сайдыы» чабырҕахсыттар бөлөхтөрө оҕону сайыннарыыга үлэлииллэр.

Биирдиилэн олоҥхоһуттар, хомусчуттар, чабырҕахсыттар бааллар. Үлэ түмүгэ — өрөспүүбүлүкэҕэ,  улууска элбэх кэккэ ситиһиилэрдээхтэр. Былырыын Илин Эҥээрдээҕи Олоҥхо күрэҕэр алын сүһүөх оҕолоро (34 оҕо) «Модун Эр Соҕотох» диэн олоҥхонон туруоруллубут  театрализованнай инсценировканы көрдөрөн, 50000 суумалаах сертификаты туппуттара.

Былырыын 3 кылаас үөрэнээччитэ Арсен Иванов СӨ Ил Дарханын национальнай бириэмийэтин лауреата  буолбута.

Биллэрин курдук, Олоҥхо 18-с үбүлүөйдээх ыһыаҕа Нерюнгри куоратыгар от ыйын 3-5 күннэригэр өрө көтөҕүллүүлээхтик буолан ааспыта. Онно Тулуна оскуолатыттан “Түһүлгэ” олоҥхоһуттар бөлөхтөрө (салайааччы Дегтярева Т.И.) уонна 3 кылаас үөрэнээччитэ Арсен Иванов (салайааччы Охлопкова И.Ф.) ситиһиилээхтик кыттан кэлбиттэрэ.

Бу дьыл сэтинньи 17 күнүттэн сэтинньи 21 күнүгэр диэри оскуола иһинэн Олоҥхо уонна Хомус нэдиэлэтин «ИСТОК» методическай холбоһук кыайа-хото тэрийдэ. Тэрээһиҥҥэ оҕолор, үлэһиттэр бары сахалыы таҥнан кэлбиттэрэ сахалыы тыыны өссө күүһүртэ.

«Уруйдан улуу Олоҥхо!» тэрээһин арыллыыта, олоҥхо тула викторина, «Олоҥхо дойдута» уруһуй күрэҕэ, научнай-практическай конференция, орто сүһүөх оҕолорго хомус олимпиадата, улуустааҕы «Олонхону толорууга — утумнаахтык» күөн күрэс, улахан сүһүөх оҕолорго «Олонхо оонньуулара», «Косплей Олоҥхо геройдара» күөн күрэс сүһүөхтэринэн үрдүк таһымнаахтык  ыытылыннылар. Тэрээһин таһымын, далааһынын хаартыскалар толору туоһулууллар. Биир да кылаас туора турбакка, үлэҕэ хоннохтоохтук, суолталаан ылсар. Ол оҕо өйүгэр-санаатыгар, этигэр-сиинигэр иҥэн, араскы буолан тыллыа, дьылҕатын ыллыгын ыйыа турдаҕа.

Маннык тэрээһиннэр оҕо сахалыы ис кутун уһугуннараллар, олоҥхо курдук уустук айымньыга суолу уураллар, сиэрдээх, толору киһи иитиллэн тахсарыгар олук буолаллар. Онуоха Тулуна оскуолата бүтүн Саха сирин үрдүнэн тумус тутуллара — бүтүн улуус киэн туттуута.

Бэйэ кэр., «Мүрү саһарҕата» хаһыат

https://xn--80aahjj1a2au6hb.xn--p1ai/olo%d2%a5ho%d2%95o-u%d2%bbujar-oskuola/