Олоҥхоһут Бөҕө Арамаана төрөөбүтэ 125 сылын туолла
Талааннаах биир дойдулаахпыт олоҥхоһут, сэһэнньит, чабырҕахсыт, мас ууһа Роман Петрович АЛЕКСЕЕВ – Бөҕө Арамаана үбүлүөйдээх күнүн көрсө, Бороҕоҥҥо олорбут дьиэтин мемориалыгар тыыннаах сибэкки дьөрбөтүн ууруу сиэригэр-туомугар улуус баһылыга Василий Алексеев, улуустааҕы култуура салаатын салайааччыта Эльза Киренская, улуус култууратын үлэһиттэрэ, чугас аймахтара, сиэннэрэ кыттыыны ыллылар.
Сүдү талааннаах киһибит саха төрүт култууратын, тылын-өһүн үйэтитээччи сырдык аатыгар сүгүрүйэн, махтанан, истиҥник ахтан-санаан аастылар. Улууспутугар олоҥхону ыччакка иҥэриигэ кылаатын киллэрэн өр сылларга Баатаҕай нэһилиэгэр “Кылыһах” ансаамбылы төрүттээн салайбыт СӨ үтүөлээх учуутала Вера Троева Бороҕоҥҥо оскуолаҕа үөрэнэр кэмигэр Роман Алексеевтаахтан чугас олорбутун ахтан-санаан ааста. Кини: «Саха омук бэйэтин культуратын этигэр-хааныгар иҥэрэн сылдьарыгар, төрүт тыла сүппэтигэр олоҥхо баай тыла-өһө эрэ быыһыыр-абырыыр, кэрэ дорҕоонунан аан дойдуга бэйэтин биллэриитигэр суолталаах», — диэн бэлиэтээтэ.
Салгыы Олоҥхо дьиэтигэр кэпсэтии тэрилиннэ. Улууспут олоҥхоһуттарын ааттара ааттанарыгар, үөрэтиллэн, чинчийиллэн үйэтитиллэригэр улахан үлэни ыыппыт СӨ культуратын үтүөлээх үлэһитэ Мария Сивцева сиһилии ырытыыта, сүбэ-соргу тыллара болҕомтоҕо ылылынна. Уус Алдан бастыҥ олоҥхоһута Роман Алексеев “Алаатыыр Ала туйгун” олоҥхото испэктээк быһыытынан улуус култууратын үлэһиттэринэн 2024 сыллаахха туруоруллан, киэҥ араҥаҕа көрдөрүллүбүтэ. Быйыл сайын Дүпсүҥҥэ анал ыһыахха төрөөбүт алааһыгар мэҥэ бэлиэ туруоруллубутун, ыраахтан чугас аймахтара кыттыылаах ыһыах үрдүк таһымҥа ыытыллыбытын туһунан астынан туран иһитиннэрдэ. Салалта өттүттэн аан дойдуга төрдүс олоҥхолоох биир дойдулаахпытыгар болҕомто инники өттүгэр уурулларыгар баҕа санаатын тириэртэ.
Бастыҥ олоҥхоһуппут хаан-уруу сыдьаана, сиэнэ Любовь Шелковникова “Странден и потомки” киинэни быйыл сайын “Саха” НКИХ тэрилтэтиттэн Евдокия Избекова редактордаах, Илья Жараев оператордаах Красноярскайынан, Пензанан, Москванан уста бара сылдьыбыттарын туһунан сиһилии билиһиннэрдэ.
ЮНЕСКО шедевр быһыытынан үтүө аатын киллэрбит сүдү олоҥхоһуппут Роман Алексеев – Бөҕө Арамаана талаанын үөрэтии салҕанан барарыгар бүттүүн турунарга диэн ыллыктаах санаа ылылынна. Онно ордук оскуола саастаах үүнэр көлүөнэни сыһыарыыга улуус үөрэҕин үлэһиттэрин кылааттара киириэн наадата ыйылынна. Роман Алексеев – Бөҕө Арамаана аатын улуу олоҥхоһуттар ааттарыгар киллэттэрэн, Уус Алдан – Олоҥхо биһигэ буолан аатырарыгар бары биир түмсүүнэн турунуоҕуҥ диэн ыҥырабыт.
Светлана Сивцева, Мүрү