«Олоҥхо алыптаах эйгэтэ» квиз-оонньуу

Норуот тылынан уус-уран бөдөҥ эпическэй көрүҥэ – олоҥхо — быйыл 2025 сылга шедевр буолбута 20 сыла. Ол чэрчитинэн ахсынньы 3 күнүгэр Дьокуускайдааҕы технология уонна дизайн коллеһын креативнай индустрия “Айар уус” кыһатын устудьуоннара П.А. Ойуунускай аатынан Литературнай музейга “Олоҥхо алыптаах эйгэтэ” диэн билиини тургутар квиз-биктэриинэ оонньуутугар кытыннылар.

Устудьуоннары уһуйааччы Ирина Степановна Каратаева аҕалан кытыннарда. Бэлиэ кэмҥэ сиэттэрэн, устудьуоннар бэйэлэрин чаҕылхай талааннарын арыйдылар. Ол курдук, оонньуу саҕаланыыта хомус лыҥкынас тыаһа дьүрүһүйдэ.

Оҕолор 3 хамаандаҕа арахсан оонньоотулар. Ол курдук, бастакы түһүмэххэ Былатыан Ойуунускай “Дьулуруйар Ньургун Боотур” олоҥхотуттан кэллэ. Оттон иккис түһүмэх “Саха литературата уонна фольклор”. Биктэриинэ оонньуутугар кыргыттар бары биир тыынынан оонньоотулар. Дьүүллүүр сүбэ эппиэттэри бэрэбиэркэлиир кэмигэр үөрэнээччилэр уһуйааччыларын кытта саха төрүт үҥкүүтүн оһуокайы тартылар.

Онон, оҕолор эрдэттэн сонун нүөмэрдэри бэлэмнээн, билиини тургутар квиз-оонньуу тутулун киэргэппиттэрэ хайҕаллаах, үөрүүлээх уонна ураты сонун көстүү. Оонньуу түмүктүүр чааһыгар хас биирдии кыттыбыт устудьуоҥҥа Туоһу сурук, кыайыылаахтарга бириис бэрилиннэ. “Айар уус” кыһатын устудьуоннара уонна уһуйааччылара олус диэн үөрдүлэр.

Ирина Степановнаҕа уонна Сардана Васильевнаҕа технология уонна дизайн коллеһын креативнай индустрия “Айар уус” кыһатын устудьуоннарын билиини тургутар квиз-оонньууга уонна музей араас ыытар тэрээһиннэригэр мэлдьи көхтөөхтүк кытыннаралларын иһин махтал сурук туттарылынна.

Артем Осипов, П.А. Ойуунускай аат. Литература түмэлин экскурсовода