Өктөм оҕолоро олоҥхону толороллор, оонньууллар, ойуулууллар

Улууспут киинигэр ыытыллыбыт Олоҥхо декадатын арыллыытыгар Өктөмтөн 6 олоҥхоһут кытынна.

Өктөмнөөҕү оҕо тыйаатырын оскуолата (дириэктэр А.И. Афанасьева) Сергей Зверев-Кыыл Уола “Кулан кугас аттаах Куллустай Бэргэн” олоҥхоттон быһа тардан, VI-VII кылаас оҕолоро туруорбуттарын олус сэргээн көрдүбүт.

Сахалыы кырыымпа тыаһа, оҕолор үҥкүүлэрэ, олоҥхо тыла-өһө, оһуокай – бу барыта көрөөччүлэри сөхтөрдө, дохсун ытыс тыаһынан доҕуһуолланна.

Биһиги ыҥырыыбытынан «Арчы дьиэтэ» норуот айымньытын дьиэтин исписэлииһэ, «Хаҥалас утума» олоҥхоһуттар түмсүүлэрин салайааччыта Прасковья Прокопьева кэлэн, биһиги олоҥхоһуттарбытын кытта Егор Лукин-Түммүт Дьөгүөр “Хаҥалас Боотур” олоҥхотун олоҕурбут ньыманан толорон, олоҥхо диэн былыр былыргаттан маннык толоруллан кэлбитин көрөөччүлэргэ иһитиннэрэн, дьон биһирэбилин ылыахтарын ыллылар.

Өктөм орто оскуолатын 7 «а» кылаас үөрэнээччилэрэ «Кэрэмэс Кэрэ Куо» диэн оҕолорго аналлаах тэттик олоҥхону куукуланан көрдөрбүттэрэ олус сонуннук көһүннэ. Бу оҕолору  Өктөм норуот тыйаатырын режиссера Зоя Аржакова салайан, бэлэмнээн аан бастакытын сыанаҕа таһаартаата. Оҕолор олоҥхону куукуланан оонньоон көрдөрбүттэрин сэҥээрдибит, астынныбыт.

Сылын аайы нэһилиэккэ ыытыллар олоҥхону олоҕурбут ньыманан толорууга уонна олоҥхону уруһуйдаан көрдөрүүгэ 23 оҕо кытынна. Бу күрэххэ, куруук буоларын курдук, нэһилиэк Аҕа баһылыга Александр Большаков, дьокутааттар уонна Фоминнар дьиэ кэргэн спонсордаатылар. Кыайыылаахтар уу харчынан бириэмийэ ылан үөрүүлэрэ үрдээтэ. Ол курдук,  олоҥхоҕо  Новгородов Айтал 1 үрдэли, Антонов Байдам 2 үрдэли, кырачаан 3 саастаах Семенова Элана 3 үрдэли ыллылар. Саамай кыра олоҥхоһут 2 саастаах Фомина Оливия “Кырачаан олоҥхоһут” диэн анал ааты ылла.

Федора Фомина, «Барҕарыы» КК дириэктэрэ.