Киэҥ Ньурба алгыстаах олоҥхотун уруйдаан
Киэҥ Ньурба устар ууну сомоҕолуур уран тыллаах олоҥхоһуттара айан-тутан хаалларбыт ытык, барҕа баайдарын кэнчээри кэскилбит иҥэринэн, өбүгэ утумун ситимин тутуохтун диэн сиэттэрэн, «Киэҥ Ньурба алгыстаах олоҥхотун уруйдаан» оҕолорго аналлаах олоҥхону толоруу улуустааҕы күрэҕэ ахсынньы 19 күнүгэр Сүлэ нэһилиэгэр «Айыы Тайбыт» култуура киинин уораҕайыгар ситиһиилээхтик ыытылынна.
Бу дьоһун тэрээһиҥҥэ барыта 54 оҕо-ыччат кыттыыны ылла. Хорула, Маар, Өҥөлдьө, Маалыкай, Антоновка, Убайаан, Ньурба уһуйааннарыттан уонна оскуолаларыттан кэлбит эдэр олоҥхоһуттар бэйэлэрин талааннарын, өбүгэ үгэһигэр бэриниилэрин көрдөрдүлэр.
Күөн-күрэс түмүгүнэн кыайыылаах бастыҥнар маннык ааттаннылар:
1-кы бөлөххө (кыра саастаах оҕолор):
• I үрдэл: Убайаантан «Родничок» уһуйаан иитиллээччилэрэ. Салайааччылар: Максимова А.Н., Андреева Л.В., Михайлова Н.А.
Биирдиилээн толорооччуларга:
• I үрдэл: Хорулаттан «Туллукчаан» уһуйаан иитиллээччитэ Николаев Ваня. Салайааччылар: Иванова А.Р., Чочанова А.А.
• III Үрдэл: Ньурбаттан «Светлячок» уһуйаан иитиллээччитэ Михайлова Күннэй. Салайааччылар: Михайлова О.Ю., Дыдорова Р.М.
2-с бөлөххө (улахан саастаах оҕолор):
Биирдиилээн толорооччуларга:
• I үрдэл: Вова Сидоров, Ньурбатааҕы оҕо ускуустуба оскуолатын үөрэнээччитэ. Салайааччы: Семенова А.Н.
• II Үрдэл: Өҥөлдьө нэһилиэгиттэн Сидор Егоров. Салайааччы: Поскачина А.А.
3-с бөлөххө (бөлөҕүнэн толорооччулар):
• I үрдэл: Ньурбатааҕы оҕо ускуустуба оскуолатын иһинэн үлэлиир «Эйгэ» фольклор ансаамбыла. Салайааччы: Семенова А.Н.
• II үрдэл: Маалыкайдааҕы оҕо ускуустуба оскуолатын иһинэн үлэлиир «Сардаҥа саһарҕалара» ансаамбыл. Салайааччы: Саввинова Л.Н.
• III үрдэл: Маар нэһилиэгин «Дьөҥкүүдэ» ансаамбыла. Салайааччы: Федорова С.П.
Анал ааттар иҥэрилиннилэр:
• «Хомоҕой тыллаах толорооччулар»: Антоновкаттан «Кулан уоланнара» Саша, Коля Степановтар. Салайааччы: Федорова Т.Ф.
• «Сэһэн сүнньүн тутааччы»: Ньурбаттан _Сидоров Вова. Салайааччы: Семенова А.Н.
• «Хомоҕой тыллаах толорооччу»: Убайаантан «Родничок» уһуйаан иитиллээччитэ Рожина Саша. (Салайааччылар ааттара суруллубатах).
• «Кэскиллээх Олоҥхоhут»: Ньурбаттан Филиппов Гена. Салайааччы: Семенова А.Н.
• «Саҥа арыйыы» анал ааты ыллылар Ньурбаттан Тоноев Айыллаан, Дубинин Артем, Салайааччы Тобонова С.И.
«Кылаан Чыпчаал» үрдүк аатын ылла Ньурбатааҕы оҕо ускуустуба оскуолатын үөрэнээччитэ Сидорова Айаана. Салайааччы: Семенова А.Н.
Бу күрэх тэриллэн ыытылларыгар, бириистэри олохтообут бары спонсордарбытыгар барҕа махталбытын тиэрдэбит:
• «Култуура уонна ыччат бэлиитикэтин» департаменыгар;
• Ньурбатааҕы олоҥхо ассоциациятын бэрэссэдээтэлигэр Тартакынова Р.В.;
• Сүлэ нэһилиэгин баһылыгар Иванов Д.Ю.;
• Сүлэтээҕи «Улыбка» уһуйаан сэбиэдиссэйигэр Абрамова Д.С.;
• Ньурбатааҕы оҕо ускуустуба оскуолатыгар;
• Ньурбатааҕы көһө сылдьар драматическай тыйаатыр дириэктэригэр Макаров Ю.А.;
• Култуура профкомугар;
• Ньурба талба талааннаахтарыгар;
• «Айыы Тайбыт» култуура киинигэр;
• Күндээдэ нэһилиэгин олохтоохторугар Антонина уонна Ольга Варламовтарга.
Өссө төгүл итии истиҥ махталбытын тиэрдэбит!
Бэҕэһээҥҥи түһүлгэ кыттыылаахтарыгар анаан этиэхпит этэ: инникитин даҕаны төрөөбүт төрүт түөлбэбит ытык аатын ааттатар үтүө-мааны дьон буола үүнүҥ-сайдыҥ, киэн туттуҥ дойдугут кэрэтинэн, үтүө ааттарынан, кинилэр үтүө холобурдарыгар үөрэниҥ! Төрүт үгэстэрбититтэн билиини, сатабылы, өйү-санааны иҥэринэн сайдыы суолун тутуһуҥ!_
Айна Семенова