Арбыҥҥа олоҥхо дьоро күннэрэ

Сэтинньи 25 күнүгэр Саха Сиригэр Олоҥхо күнэ биллэриллибитэ. 2005 сылтан бу  күн ЮНЕСКО саха эпоһын киһи аймах материальнайа суох шедеврин быһыытынан билиммитэ быйыл 20 сылын туолла.

Арбыҥҥа, үгэс быһыытынан, сэтинньи 25 күнүттэн ахсынньы 5 күнүгэр диэри олоҥхону киэҥник тарҕатыыга «Олоҥхо-2025» декада ыытылынна. Бастакы тэрээһиммит сэтинньи 25 күнүгэр  сахалыы таба суруйуу үөрүйэҕин сайыннарар, олоҥхо баай тылын-өһүн, билиини-көрүүнү кэҥэтэр сыаллаах, Өрөспүүбүлүкэтээҕи «ОЛОҤХО ДЬЫКТААНА-2025» аахсыйаттан саҕаланна. Олохтоох бибилэтиэкэ сэбиэдиссэйэ А.Н. Иванова И.И. Бурнашев-Тоҥ Суорун «Сылгы уола Дыырай Бухатыыр» олоҥхотуттан быһа тардыыттан улахан дьоҥҥо дьыктаан суруттарда.

Дьыктаан түмүгүнэн, биир да сыыһата суох суруйан, «Бастыҥтан бастыҥ суруксут» үрдүк ааты ыллылар:  тыа хаһаайыстыбатын специалиһа Иванова Сусанна Дмитриевна уонна почта үлэһитэ Попова Зоя Васильевна.

Орто оскуола үөрэнээччилэригэр “Тускул” култуура киинэ олохтоох бибилэтиэкэни кытта Нам улууһун олоҥхоһуттарын туһунан иһитиннэрии, оҕолорго олоҥхо викторината, Василий Каратаев “Модун Эр Соҕотох” олоҥхотун култуура киинин уус-уран салайааччыта Владислав Барамыгин толоруутун тэрийэн ыыттыбыт. Бу олоҥхону “Сир симэҕэ” оҕо уһуйааныгар, дьиэҕэ олорор кырдьаҕастарга сылдьан иһитиннэрдибит.

Ону таһынан П.П. Ядрихинскай-Бэдьээлэ аатынан култуура киинин коллективын ыҥырыытынан, Владислав Барамыгин Олоҥхо декадатын тэрээһинигэр кыттан, олоҥхо толорон, оһуохайдатан Көбөкөн нэһилиэгин дьонун бииргэ түмтэ.

Бэйэ информ.