“Олоҥхо тойугун дуораана” фольклор бэстибээлэ түмүктэннэ
Кэбээйи нэһилиэгэр 2026 сылга ыытыллыахтаах Олоҥхо ыһыаҕар бэлэмнэнии тэрээһинин чэрчитинэн, Наталья Ивановна Полятинская салайааччылаах Кэбээйитээҕи “Сайдам” норуот айымньытын киинин тэрийиитинэн, нэһилиэккэ “Олоҥхо тойугун дуораана” диэн холбоһуктаах тэрилтэлэр кыттыылаах олоҥхону толорууга фольклорнай бэстибээл ыытылынна.
Олоҥхо түһүлгэтин арыллыытыгар Дьокуускайдааҕы Олоҥхо тыйаатырын артыыската — Анастасия Алексеева толорбут олоҥхотун мустубут дьон күөх экран нөҥүө сэҥээрэ иһиттилэр, көрдүлэр.
Нэһилиэкпитигэр үлэлии олорор тэрилтэлэрбит бары биир сомоҕо буолан, көхтөөх кыттыыны ыллылар. Ол курдук, фольклорнай фестивалы аан бастакынан “Мичээр” оҕо уһуйаанын, электростанция уонна баһаарынай чаас үлэһиттэрэ — олохтоох автор, РФ уопсай үөрэхтээһинин туйгуна, педагог-наставник, нэһилиэк бочуоттаах олохтооҕо – Татьяна Максимова “Будулҕан буурҕа айаннаах, Буура Дохсун Бухатыыр” олоҥхотун 31 кыттааччыны хабан туруордулар.
Кыттааччылар олоҥхо дьоруойдарын, уратылаахтык оруолга киирэн, уобарастарын арыйан толордулар. Олоҥхо-испэктээкил саҕаланыаҕыттан бүтүөр диэри тойугунан, кырыымпанан, уотунан-күөһүнэн киэргэтэн, көрөөччүлэр болҕомтолорун тартылар. Бу олоҥхоҕо – “Кыыс Кэрэ Куо” оруолун тойугунан — Күннэй Васильева, “Тоҥ Дуурай” абааһы оруолун – Юрий Находкин толорбуттарын көрөөччүлэр сэргии көрдүлэр. Сүбэ хамыыһыйа бу олоҥхо-испэктээкилгэ – 4,72 баалы туруорда.
“Олоҥхо тойугун дуораана” диэн иккис холбоһуктаах тэрилтэлэр кыттыылаах олоҥхону толорууга — “Заречнай” олох-дьаһах коммунальнай хаһаайыстыбата, “Кэскил” потребобщество, М.С.Сметанина аатынан врачебнай амбулатория, аптека, П.Д.Степанов аатынан улуустааҕы кыраайы үөрэтэр түмэл тэрилтэлэрэ – биир дойдулаахпыт Ф.С.Семенов – Кырса Сөдүөт “Биэ уола Бэйбэлдьийэтулаайах” олоҥхону 43 киһини хабан туруордулар. Олоҥхону — театрализованнай туруоруунан, үҥкүүнэн, тойугунан, хомуһунан тыыннаах доҕуһуолунан киэргэтэн-ситэрэн биэрдилэр. Олоҥхо киэҥ киэлитин көрдөрөн, тыас-уус, уот –күөс доҕуһуолунан, бухатыырдар охсуһууларын оруолларыгар киирэн көрдөрдүлэр. Ол курдук, олоҥхоҕо кэпсэнэринэн аллараа дойду адьарай ааттаах “Абааһы” оруолун Агафья Евелева, “Үрүҥ Самалдьыйа” оруолун Т.Сметанин аатынан норуодунай тыйаатыр бэтэрээн артыыската – Февронья Кокорева, “Ытык Сиэкилэ Кыыс” оруолун Айыына Харлампьева үҥкүүнэн киэргэттэ, “Алгыс” тойугун Нажеда Обутова уонна “кэбээйилии” оһуохайын – Ульяна Дьяконова таба тайанан толордулар. Түмүккэ, сүбэ хамыыһыйа – 4,76 баалы ылан иккис миэстэҕэ таҕыстылар.
Салгыы, олоҥхо түһүлгэтигэр администрация, “Сахатранснефтегаз”, Г.Г.Кобяков аатынан модельнай библиотека, МФЦ, И.В.Терехов аатынан оҕо спортивнай оскуолатын тэрилтэлэрэ – М.Обутова-Эверстова суруйуутунан “Үс үүт күрүөнү үрдүнэн көтөр, Үрүлү Бэргэн бухатыыр” олоҥхоҕо 25 кыттааччы хабылынна. Ол курдук, “Үрүлү Бэргэн” бухатыыр оруолун — Николай Обутов, “Арылы Куо” оруолун – Айталина Кобякова, “Аҥаар харах Арсаала” оруолун — Иван Горохов, “Арбай Куоҕай” абааһы оруолун – Светлана Оконешникова уонна “Айгыр Ойуун” оруолун – Сергей Егоров олус табыллан оонньоотулар. Бу олоҥхо-испэктээкилгэ бухатыырдар охсуһууларын уоту-күөһү, тыаһы-ууһу таба туһанан, оонньообуттарын көрөөччүлэр биһирии көрдүлэр. Олоҥхо бэстибээлин үһүс түһүмэҕин сүбэ хамыыһыйа – 4,65 баалынан сыаналаата. Түмүктүүр бэстибээлгэ Константин Оросин “Дьулуруйар Ньургун Боотур” олоҥхо-испэктээкилин Е.Е.Эверстов аатынан орто оскуола 64 кыттааччыта олоҥхо саҕаланыаҕыттан бүтүөр диэри тойугунан, кырыымпанан, уотунан-күөһүнэн киэргэтэн, туруоруу маастарыстыбата үрдүктүк сыаналанна. Тэрээһин өрө көтөҕүллүүлээхтик ыытылынна, саҥа талааннар арылыннылар, уопсайа ыытыллыбыт бэстибээлгэ 164 киһи кыттыыны ылла.
Сүбэ хамыыһыйа олоҥхо ис-хоһоонун арыйыыны, толоруу маастарыстыбатын, көстүүмнэрин, сыанаҕа тутта-хапта сылдьыыларын көрөн сыаналаан баран — 1 миэстэни Е.Е. Эверстов аатынан орто оскуолаҕа анаата.
Олоҥхо бэстибээлигэр култуура үлэһиттэрэ хас биирдии сыһыарыллыбыт тэрилтэлэригэр, ол эбэтэр “Мичээр” оҕо уһуйаанын, электростанция уонна баһаарынай чаастэрилтэтигэр – Терехова С.Е., “Заречнай” олох-дьаһах коммунальнай хаһаайыстыбата, “Кэскил” потребобщество, М.С.Сметанина аатынан врачебнай амбулатория, аптека, П.Д.Степанов аатынан улуустааҕы кыраайы үөрэтэр түмэл холбоһуктаах тэрилтэтигэр – Кириллина Е.М., администрация, “Сахатранснефтегаз”, Г.Г.Кобяков аатынан модельнай библиотека, МФЦ, И.В.Терехов аатынан оҕо спортивнай оскуолатын тэрилтэлэригэр – Эверстов К.И., Е.Е.Эверстов аатынан орто оскуола кэлэктиибигэр – Петров А.Е. дьону түмэ тардан, таҥастарын тигэн, бэлэмнээн фестиваль үрдүк таһымнаахтык барарыгар улахан болҕомтону ууран үлэлэстилэр. Бу ыытыллыбыт тэрээһин түмүгүн ырытан көрдөххө, кэбээйилэр ыытыллаары турар Олоҥхо ыһыаҕар бары биир сомоҕо буолан кыттыыны ыларга бэлэмнэр.
Ефросинья Кириллина.
