Бүлүүгэ олоҥхоһут Харатай Баһылай сыла арылынна
2026 сыл Бүлүү улууһугар Утумнааһын уонна айымньылаах үлэ сылынан, оттон ытык Бүлүү култууратын эйгэтигэр биир дойдулаахпыт, Саха сирин биллиилээх олоҥхоһута Василий Осипович Каратаев–Харатай Баһылай төрөөбүтэ 100 сылынан биллэриллибитэ.
Бу дьыл тохсунньу 14 күнүгэр, Харатай Баһылай күн сирин көрбүт күнүгэр, кини үбүлүөйдээх бэлиэ сылын арыйыы дьоро тэрээһиннэрэ ыытылыннылар.
Сарсыарда өттүгэр олоҥхоһут пааматынньыгар сибэкки дьөрбөтүн ууруу, алгыс сиэрэ-туома, “В.О. Каратаев үйэлээх олоҥхолоро” кинигэ биһирэмэ бэрт сэргэхтик аастылар.
Ытык ыалдьыттарынан буоллулар: В.О. Каратаев аатын, олоҥхолорун киэҥ эйгэҕэ таһаарбыт фольклорист, аан дойду таһымнаах эпосовед учуонай, тыл билимин дуоктара, бэрэпиэссэр Василий Васильевич Илларионов, өрөспүүбүлүкэҕэ олоҥхону чинчийиигэ, тарҕатыыга киэҥ далааһыннаахтык уонна утумнаахтык үлэлэһэ сылдьар дьоммут – Олоҥхо ассоциациятын бэрэсидьиэнэ Феврония Васильевна Шишигина, Олоҥхо кииниттэн Елена Николаевна Протодьяконова, Ульяна Михайловна Флегонтова.
760 сирэйдээх бэрт дьоһун кинигэни Ил Дархан стипендиата, В.О. Каратаев аатынан норуодунай кэлэктиип салайааччыта Светлана Тарасовна Иванова, олоҥхоһут төрөппүт кыргыттара Анна Васильевна Мандарова, Ольга Васильевна Павлова сүүрэн-көтөн таһааттардылар.
Кинигэҕэ дьоҥҥо-сэргэҕэ киэҥник биллибит “Модун Эр Соҕотох”, “Эрбэхтэй Бэргэн”, “Оҕо Тулаайах” олоҥхолортон ураты өссө бэчээккэ тахса илик “Дьирибинэ Боотур” уонна Василий Осипович тиһэх ситэриллибэккэ хаалбыт “Уолуйа Боотур” олоҥхолоро киирдилэр.
Олоҥхо кинигэтин иллюстрацияларын Бүлүү куоратын эдэр худуоһунньуктара Афанасий, Тамара Ивановтар оҥорбуттар. Биир кэрэхсэбиллээҕэ – куйаар куодунан киирэн, оҥоһук өй көмөтүнэн хамсыыр хартыыналары көрүөххэ сөп.
Биһирэмҥэ Светлана Тарасовна Иванова салайааччылаах В.О. Каратаев аатынан олоҥхоһуттар уонна тойуксуттар норуодунай кэлэктииптэрэ, өрөспүүбүлүкэтээҕи “Олоҥхо баттл-2023” күрэх кыайыылааҕа Станислав Иванов олоҥхолоон доллоһуттулар, дьон сэҥээриитин ыллылар.
Маны сэргэ Харатай Баһылай олоҕун уонна айар үлэтин сырдатар, М.Н. Жирков аатынан Оҕо ускуустубатын Бүлүүтээҕи оскуолатын ойуулуур-дьүһүннүүр филиалын үөрэнээччилэрин уруһуйдарын быыстапкалара тэрилиннэ.
Архыыптан видео устуулары көрдөрдүлэр.
“В.О. Каратаев айар нэһилиэстибэтин тарҕатыы соруктара” төгүрүк остуол тула кэпсэтиигэ Бүлүү улууһа олоҥхону үөрэтиигэ, тарҕатыыга тирэх улуус буоларын, үүнэр көлүөнэни олоҥхоҕо сыһыарыы уһуйаан саастан ыытыллыахтааҕын, олоҥхо лааҕырдара улахан көдьүүстээхтэрин, олоҥхоһуттарга, олоҥхону толорооччуларга, олоҥхоҕо уһуйааччыларга улахан болҕомто ууруллуохтааҕын, Бүлүү олоҥхотун уратыларын чинчийэр тоҕоостооҕун бэлиэтээтилэр.
Киэһэтин сылы арыйар дьоро мунньахха махтал тыллар этилиннилэр, саҥа соруктар турдулар.
Ытык кэрэ киһибит Василий Осипович Каратаев – Харатай Баһылай сүҥкэн нэһилиэстибэтэ өссө да тэнийэ, үрдүү туруохтун!
Лилия Васильевна Семенова, Бүлүү.