Олоҥхоттон саҕаламмыт тыйаатыр

Быйыл Саха национальнай тыйаатыра төрүттэммитэ 120 сыла. Ил Дархан ыйааҕынан бэлиэтэнэр чопчу күннээх буолла — тохсунньу 16 күнэ. Онон Култуура сылыгар П.А. Ойуунускай аатынан Саха академическай драматическай тыйаатырга үбүлүөйдээх сыл тосхойдо.

«Ити дата ханнык түгэнтэн ааҕыллар?» диэтэргит, 1906 сыл тохсунньу 3 күнүгэр Бирикээсчиттэр кулууптарыгар (Атыы-бырамыысыланнай уонна уопсастыбаннай тэрилтэлэр идэлээх сойуустарын кулууба) Бүөтүр Охлопков-Наара Суох “Бэрт киһи Бэриэт Бэргэн” диэн олоҥхотунан биллэр бэлитиичэскэй диэйэтэл, уһулуччулаах уопсастыбанньык, сырдыгы саҕааччы, суруйар дьоҕурдаах Василий Никифоров-Күлүмнүүр испэктээк туруорбута.

Сүрүн оруоллары олоҥхоһут Наара Суох бэйэтэ, ону сэргэ саха бастакы үөрэхтээх дьахтара, олоҥхоһут, этнограф, ырыаһыт, фольклору хомуйааччы, учуонай, чинчийээччи Мария Андросова-Ионова, айар тыл аҕата, бөлүһүөк суруйааччы Алексей Кулаковскай-Өксөкүлээх Өлөксөй толорбуттара.

Испэктээк куорат олоҕун сэргэхсиппитэ чахчы. «Это был очень торжественный момент в культурной жизни саха» диэн суруйаллар чинчийээччилэр.

Хаартыскаҕа “Бэрт киһи Бэриэт Бэргэн” кыттыылаахтара: бастакы эрээккэ – И.Ф. Афанасьев, Н.У. Егоров; иккис эрээккэ – В.Ф. Артамонов (иккис), В.В. Никифоров (төрдүс), М.Н. Андросова-Ионова (бэһис), И.Г. Васильев (алтыс). 1906 с.