Олоҥхо ыһыаҕар оҥоһук бэлэмнии таарыйа

Бу күннэргэ Кэбээйигэ «Мичээр” оҕо сайдар киинин үлэһиттэрин ортотугар иитээччи иэйиитин мөлтөөһүнүн сэрэтэр сыаллаах тэрээһини сүрүннүүр иитээччи Анастасия Афанасьевна Сметанина тэрийдэ.

Киһи уйулҕатынан, өйүнэн-санаатынан дьарыктанар Любамира Никитиналыын сүбэлэрин холбооннор, үс күн устата олоҥхо ыһыаҕын тиэмэтигэр сөп түбэһиннэрэн, сахалыы тыыннаах, ыһыахха сыһыаннаах маастар-кылаастары иилээн-саҕалаан бэрт сэргэхтик ыыттылар.

Маастар-кылаастары илиинэн туттууга дьоҕурдаах иитээччилэр эбии үөрэхтээһин педагогтара Анна Софронеева, Марина Попова уонна иитээччи Анастасия Обутова ыыттылар. Бу иитээччилэри билиһиннэрдэххэ, Анна Ивановна 13 сыл устата уһуйаан иитиллээччилэрин илиинэн туттуу дьоҕурун дьарыгар такайар: «Чопчу биир хобби буолбакка, илиинэн тутан, айан оҥоһуллар араас хайысханы сөбүлүүбүн. Кумааҕыттан саҕалаан, туойугар тиийэ туттабын. Оҕо эрдэхпиттэн уруһуйдуур этим, ол саҕана кумааҕы куукула кырыйыытыттан саҕаламмыта, куукулаҕа таҥас уруһуйдаан, дьиэ оҥорон, кэлин кылааска солбуллубат редколлегия чилиэнэ буолбутум, эркин хаһыата оҥорон миэстэлэһээччибит. Ийэм Мария Ильинична уран тарбахтаах буолан, кини иистэнэрин көрөн улааппытым. Оҕолорун барыларын төбөлөрүттэн-атахтарыгар диэри таҥыннаран улаатыннарбыта. Түүлээх бэргэһэтиттэн, тыс этэрбэһигэр тиийэ бэйэтэ имитэн, улларан тигэрэ. Тирии имитиитигэр көмөлөһүннэрэрэ, талкынан тыс, тирии имитии олус ыарахан буолара. 80-с сылларга мотуок сабынан муодунай дьууппа баайбыта. Ол саҕана ыалбыт, иистэнньэҥ бэрдэ Харлампьева Анна Иннокентьевна киирэн маастар-кылаас ылара. Онон кэрэни кэрэхсиирбэр ийэм оруола баар дии саныыбын», — диэн Анна Ивановна илиинэн туттууга дьоҕура хантан ситимнэнэн кэлбитин кэпсиир.

Марина Игнатьевна дьоҕурун, талаанын оҥкула оҕо эрдэҕиттэн ийэтиттэн күөдьүйбүтүн этэр: “Ийэм баайыннан дьарыктанарын көрөн улааппытым. Биһиэхэ, бэйэтигэр, дьоҥҥо сакаас таҥастары баайара, быыстапкаларга кыттара. Мин билигин илиинэн оҥорон таһаарыы араас ньыматынан дьарыктанабын. Дьиэбэр декор бэйэм оҥорорбун сөбүлүүбүн. ⁠2022 сылтан кумааҕыттан лоза оҥорор ньыманы олус сөбүлээн тутта сылдьабын».

Марина Игнатьевна оҕолору илиинэн оҥорон таһаарыы араас ньымаларыгар үөрэппитэ 21 сыл буолла.

Эдэр иитээччи Анастасия Васильевна Обутова сөбүлүүр дьарыга уруһуй, тиэстэнэн арааһы оҥорон таһаарыы: “Иитээччинэн үлэлии киирээт, “Күн түһүлгэ көбүөрэ” иитии-үөрэтии бырагырааматын биэс уобалаһын хабар элбэх функциялаах оонньууну толкуйдаан оҥорбутум. Билигин илиинэн оҥорууга хонноҕум арыллан, астынан үлэлиибин. Тэриллэрбин, босуобуйаларбын бэйэм оҥорон таһаарабын”.

Дьэ, сити курдук бииртэн-биир тарбаҕар талааннаах иитээччилэр “Дьөһөгөй оҕото”, “Отонноох ыаҕайа”, “Моторуйан, дьэ, собо» маастар-кылаастары сүбэлэрин холбоон, үлэ кэмигэр кэпсэтэн, үөрэн-күлэн, күннээҕи түбүгү умна түһэн,сахалыы тыыннаах оҥоһуктары айан таһаардылар.

Үлэ түмүгэр Любамира Матвеевна “Эмоциональное выгорание педагога» бэсиэдэтин, оонньуулары ыытан, «Баҕа санаа” картатын оҥорторон нэдиэлэни түмүктээтэ.

Татьяна Максимова-Лазарева