“Бүдүрүйбэт сүһүөхтээх Мүлдьү Бөҕө” олоҥхонон испэктээк хас сырыы ахсын чочуллан иһэр

Быйыл Кэбээйибит сиригэр-уотугар Олоҥхо ыһыаҕар аналлаах тэрээһиннэр тиһигин быспакка ыытылла тураллар. Бу суолталаах тэрээһин чэрчитинэн, И.А. Николаев – Куоҕас Уйбаан “Бүдүрүйбэт сүһүөхтээх Мүлдьү Бөҕө” олоҥхотун Кэбээйитээҕи Тимофей Сметанин аатынан норуодунай тыйаатыр, “Сайдам” норуот айымньытын киинин сыанатыгар иккис төгүлүн туруорда.

Олоҥхо сүрүн дьоруойдарын тыйаатыр артыыстара оруолларыгар киирэн, табыллан оонньоотулар, кылыһахтаах куоластарынан туойан, испэктээк ис хоһоонун арыйдылар. Бухатыырдар охсуһууларын барылын уот-күөс, тыас-уус киэргэтиллэн, ураты тыыннаан биэрдэ.

Ол курдук, Мүлдьү Бөҕө оруолун Антон Петров толору арыйда. Үрүҥ Уолан – Климентий Эверстов, оттон Ат сылгы оруолун бастакы холонуутугар Филипп Харлампьев үҥкүүнэн киэргэттэ.

Аллараа дойду олоҕун оҥкулун көрдөрөр, абааһы кыыһын уобараһын Аксиния Сыроватская, Харалыыр Мохсоҕол абааһы уолун Юрий Находкин таҥастара-саптара толору ситэриллэн, табыллан оонньоотулар.

Испэктээккэ уопсайа 20 киһи кытыыны ылла. Тыаһын-ууһун звукооператор Василий Габышев таҥан оҥордо. 

Таҥаһын-сабын тыйаатыр худуоһунньуга Марфа Кобякова, СӨ норуотун маастара Елизавета Софронеева, Мотрена Левина бэлэмнээтилэр.

Хас туруоруу аайы испэктээк дьоруойдарын хамсаныылара, таҥастара-саптара саҥардыллан, чочуллан иһэрин туһунан тыйаатыр режиссера тоҕоһолоон бэлиэтээтэ.

Аны кулун тутар ыйга өрөспүүбүлүкэтээҕи научнай-методическай конференция чэрчитинэн ыытыллар тэрээһиҥҥэ бу испэктээк үгүс дьон көрүүтүгэр тахсыаҕа.

“Сайдам” норуот айымньытын киинэ