Анжелика Иванова: «Олоҥхону тарҕатарга үлэлиибит»

Хаартыска: А.Васильева түһэриитэ.

Дьокуускайга буола турар Култуура пуорумун чэрчитинэн, Олоҥхо дьиэлэрин үлэһиттэригэр сэминээр буолан ааста. Исписэлиистэр икки күн устата үөрэннилэр, уопут атастастылар, алтыстылар. Бу туһунан санааларын үллэстэллэр. 

Анжелика Иванова, Амма улууһун Олоҥхо дьиэтин, Екатерина Захарова аатынан Култуура киинин дириэктэрэ, Эмис нэһилиэгэ:

— Быйыл Култуура сыла биһиэхэ саамай эппиэтинэстээх уонна үөрүүлээх сыл буолар. Үлэбит икки бүк үрдээн, сөпкө учуоттанан, ыйыллыбыт былааны толорон, саҥа сүүрээннэри киллэрэн,  тэтимириэн наада.

Олус туһалаах, үчүгэй сэминээрдэр буоллулар. Бэҕэһээ сарсыарда «Арассыыйа — мин устуоруйам» мусуойтан үлэбит саҕаламмыта. Ол кэнниттэн Гагарин аатынан Аныгы ускуустуба кииинигэр үлэлээбиппит. Үлэбит хаамыыта сайдан, аныгы технологияҕа көһөрүллэн, дьону-сэргэни култуураҕа сыһыаран, олоҥхоҕо үөрэтэн, ол үлэбит барыта  өссө тиийимтиэ уонна түргэн буолара наада.

Амма улууһунааҕы Олоҥхо дьиэтэ биһиэхэ, Эмискэ, баар. Ону бары интэриэһиргииллэр. Эмис нэһилиэгэр 13 улахан, ааттаах-суоллаах олоҥхоһут төрөөн-үөскээн ааспыта. Олортон биирдэстэрэ — Былатыан Ойуунускай «Эмис Чээбийдии этэн дьэргэлдьиттэхпинэ» диэбитинии, Тимофей Васильевич Захаров-Чээбий буолар. Ону тэҥэ,  Владимир Михайлович Новиков-Күннүк Уурастыырап, Михаил Михайлович Новиков-Мэлэх Мэхээлэ, уо.д.а. Билиҥҥэ диэри кинилэр суруйан, айан хаалларбыт олоҥхолорун норуот, ыччат дьон толоро сылдьар. Онон биһиги киэн туттабыт.

Учуонайбытыгар Виктор Николаевич Васильевка махтанабыт. Кини оччолорго, 1906 сыллаахха олоҥхону илиинэн устан, суруйан хаалларбыта. Ол билигин бэчээккэ тахсан, номнуо элбэх кинигэлээхпит. Норуот туохха да кэмнэммэт сыаналаах баайын — олоҥхону тарҕатарга күүспүт-уохпут баарынан үлэлии-хамсыы сылдьабыт.

Ангелина Васильева.