3375 оҕо кытынна

Үүнэр көлүөнэлэр тус сыаллаах пуондаларын өйөбүлүнэн Олоҥхо ассоциацията бу сыл устата “Олоҥхо дойдутугар айан” диэн хас да хайысхалаах бырайыагы үлэлэтэ сылдьар: олоҥхо оонньуурдара, олоҥхо ойуулуга, олоҥхо испэктээгэ, олоҥхо уруһуйа, о.д.а.

Национальнай бибилэтиэкэ “Олоҥхо” сайтын тэрийээччилэрэ онно кыттыһан, Национальнай кэнсиэпсийэ 35 сылынан төрүт култуураҕа туһуламмыт “Олоҥхо” онлайн-олимпиаданы үс төгүл төхтөрүйэн туран ыыттыбыт. Холбоон барыта 3375 оҕо кытынна.

Дьиҥэр,  биирдэ күргүөмнээхтик ыам ыйыгар барыахтаах этэ – Кэнсиэпсийэ бигэргэммит бэлиэ күнүн көрсө. Ону үөрэх дьылын бүтүүтэ диэн, киин куорат оскуолалара аккаастаммыттара. Ол иһин саас улуустарга эрэ буолбута: 1648 оҕо тургутугу толорбута.

Эрдэ биллэриллибит балаһыанньанан, көхтөөх кыттыыга бириистээх күрэхтэһиилээҕэ.

Улуустарга (оройуоннарга):

I миэстэ – 16 тыһыынча солкуобай;

II миэстэ –14 тыһыынча солкуобай;

III миэстэ – 12 тыһыынча солкуобай.

Дьокуускай куораттааҕы уокурук оскуолаларыгар:

I миэстэ – 12 тыһ. солк;

II миэстэ – 9 тыһ. солк;

III миэстэ – 7 тыһ. солк.

Ити харчынан наҕарааданы Үүнэр көлүөнэлэр тус сыаллаах пуондата Олоҥхо дэкээдэтин кэмигэр туттарыахтаах.

Бастакы бөлөххө Таатта улууһун саха тылын учууталларын методическай холбоһуга бастаабыта (сал. Г.Ф. Им), II миэстэ – Чурапчы (сал. Ф.Н. Болдовская), III миэстэ – Ньурба (сал. А.В. Мясоедова). Ити туһунан сиһилии суруйан турабыт: https://olonkho.nlrs.ru/archives/10452

Онтон, дьэ, балаҕан ыйыгар аны Дьокуускай куораттааҕы уокурук оскуолаларыгар олимпиадабытын хатылаабыппыт. Онуоха 1506 оҕо холонон көрбүтэ.

Итинтэн 312 үөрэнээччитэ – Сэбиэскэй Сойуус Дьоруойа Ф.К. Попов аатынан 20-c нүөмэрдээх оскуолаттан. Онон үөрэх бу кыһата I миэстэни ылар.

II миэстэ – Саха гимназията (285 оҕо).

III миэстэ – Саха политехническай лиссиэйэ (201 оҕо).

Аны туран, бу олимпиада ыраах хоту олорор оҕолор өрөспүүбүлүкэтээҕи таһымнаахха кытталларыгар олус табыгастаах диэн, төһө да саас ыытыллыбытын үрдүнэн, алтынньыга кинилэргэ анаан хаттаан ыыттыбыт. Усуйаанаттан Тумат, С.В. Горохов аатынан уонна Хаһаачыйа, Муоматтан Төбүлэх, Абыйтан Кэбэргэнэ уонна Муҥурдаах, Дьааҥыттан Баатаҕай, Өймөкөөнтөн Сордонноох оскуолалара көхтөөхтүк кытыннылар.

Олимпиаданы көҕүлээбит учууталларга Махтал суруктары электроннай киэбинэн бу нэдиэлэҕэ тиксэриэхпит.

Оттон сотору сэтинньигэ “Олоҥхо дьыктаана” аахсыйа чэрчитинэн ыытыллар тута тургутукпут буолуоҕа, онно өссө көхтөөхтүк кыттыаххыт диэн эрэнэбит уонна эрэйэбит.

Ыйытыылаах буоллаххытына, 89142223579